‘मिसेस वल्र्ड’मा सहभागी हुन क्लाइभलाई अमेरिकी सरकारले दिएन भिसा

एजेन्सी 

आगामी जनवरी १५ मा अमेरिकामा सम्पन्न हुन गइरहेको मिसेस वल्र्डका लागी बेलायतको प्रतिनिधित्व गर्दैँ जान लागेकी लीन क्लाइभलाई अमेरिकी सरकारले भिसा दिन अस्वीकार गरेको छ ।

२९ वर्षीया लीनले मिसेस वल्र्डको फिनालेमा बेलायतको प्रतिनिधित्व गर्दै आवेदन भर्नुभएको थियो । तर, उहालाई सिरियामा जन्मेको कारण अमेरिकाले भिसा दिन नमानेको हो । जसकारण यो प्रतिस्पर्धा नै विवादित हुन पुगेको छ ।

सन् २०१३ मा बेलायत आएपछि उहाले अग्रेजी भाषा बोल्न सिक्नुभएको थियो । साथै, महिला समानता र शरणार्थीहरुका लागि अभियान समेत चलाउनु भएको थियो । तर, भिसाकै कारण बेलायत सरकारले उहालाई अमेरिकामा पठाउन सक्दैन ।

उहाले भन्नुभएको छ, ‘मैले बेलायती राहदानीले नै आवेदन दिएँ। मैले प्रतिस्पर्धामा बेलायती नागरिक भएर नै प्रतिनिधित्व गर्दै थिएँ । म बेलायती नागरिक हुँ। जसकारण अमेरिकाले प्रतिबन्ध लगाउँला भनेर सोचेको पनि थिएन ।’ लीनले ‘कमन सेन्स’ प्रयोग गरेर भएपनि आफूलाई प्रतियोगितामा सहभागी गराउनुपर्ने भन्दै अमेरिकी दुतावासलाई भिसा दिन अपिल गर्नुभएको छ । 

‘भिसा रेकर्डहरु अमेरिकी कानुनअन्तर्गत गोप्य छन् । जसकारण हामी व्यक्तिगत भिसा मुद्दाहरुको बारेमा छलफल गर्न सक्दैनौँ,’ अमेरिकी दुतावासको एक विज्ञप्तिमा उल्लेख छ ।