रातो टालोमा ५० बर्षअघिको प्रेमकथा

Posted on: January 29, 2020
आर्टिष्ट खबर/ माघ, काठमाडौं ।

५० वर्ष अघिको अन्तरजातीय प्रेमकथालाई भिडियोमा हेर्न पाइने भएको छ । ‘रातो टालो’ नाम दिइएको उक्त भिडियो आउँदो फागुन २ गते प्रेमदिवसका दिन काठमाडौंमा प्रिमियर गरिनेभएको हो ।

कर्णाली प्रदेशको हुम्लामा तत्कालिन अवस्थामा फष्टाएको उसबेलाको अन्तरजातीय पौराणिक प्रेमकथालाई त्यहाँ केही युवाले भिडियोमा उतारेका छन् । भिडियो निर्माण समूहले सार्वजनिक हुन लागेको भिडियोको पोस्टर सार्वजनिक गरेको छ । सार्वजनिक पोस्टरमा युबिना भट्टराई र सूर्यबहादुर शाही फिचर्ड छन् ।

भिडियोका निर्देशक डाइमण्ड उप्रेतीले प्राकृतिक सुुन्दरताले भरिपूर्ण नेपाली खस भाषा तथा लिपीको उद्गमस्थल कर्णालीको कला, संस्कृति, चालचलन, भेषभुषा, रहनसहनलाई भिडियोमा समेटिएको बताए । ‘हुम्लाको खस भाषामा आधारित रहेर आजभन्दा ५० वर्ष अघिको अशिक्षित समाज, शासन व्यवस्था र परम्परागत सत्यतथ्य कथामा आधारित रहेर अन्तरजातीय पौराणिक प्रेम कथालाई भिडियोमा समेटेका छौं’, निर्देशक उप्रेतीले भने, ‘भिडियोमा अहिलेको युवाले बुझ्नुपर्ने हिजो र आजको मायाको आभाष तथा मायामा हुने अदृश्य द्वन्द्वलाई उजागर गरिएको छ । कानुनमा सीमित भए पनि ५० वर्ष अघि जे थियो, अहिले पनि त्यो समाजले जातीय विविधतालाई स्वीकारी सकेको छैन ।’

‘रातो टालो’मा जगदिश हमालको प्रस्तुती, कथा, गीत, संगीत र स्वर छ । भिडियोमा जगदिश हमाल, शोभा शाही र छिरिङ सोनाम लामाको पनि अभिनय छ । आश्मा पोखरेलको सह–निर्देशन, इतुशा पोखेलको छायांकन रहेको भिडियोमा अविनाश लामाको सह–छायांकन छ । भिडियो रातो टालो प्रोडक्सन र स्टुडियो लोइथोको व्यानरमा बनेको हो ।




Artist Khabar Media Pvt. Ltd.
Gongabu, Kathmandu
+977-9849953656, 9803082553,01-4387307
[email protected]