कार्यशालामा सात प्रदेशकै नृत्य प्रशिक्षण

Posted on: January 19, 2022
आर्टिष्ट खबर/ माघ, बुटबल । 

नेपाल संगीत तथा नाट्य प्रज्ञा प्रतिष्ठानको आयोजना र नृत्यकर्मी संघ नेपाल रुपन्देही जिल्ला समितिको ब्यबस्थापनमा रुपन्देहीको शँकरपुर (बुटबल)मा यतीबेला नृत्य सिक्ने सिकाउने कार्यशाला चलिरहेको छ । मँगलबारबाट त्यहाँ राष्ट्रिय नृत्य निर्देशक कार्यशाला–२०७८ सुरु भएको हो ।

यो कार्यशालाको मँगलबार दिउँसो लुम्बिनी प्रदेशकी कानून, महिला बालबालिका, जेष्ठ नागरिक तथा संस्कृति मन्त्री रमा घर्तीमगरले उद्घाटन गर्नुभयो ।  कार्यक्रमलाई सम्बोधन गर्दै उहाले लुम्बिनी प्रदेशमा पनि चाँडै लुम्बिनी प्रदेश प्रज्ञा प्रतिष्ठान गठन गर्ने बताउनुभयो । यो कार्यशालामा सहभागीले एक आपसमा नृत्य सिक्नु सिकाउनु प्रसँसनीय कार्य भएको उहाले बताउनु भयो । 

८ माघसम्म चल्ने यो कार्यशालामा सहभागी सबैले एउटा एउटा नृत्य प्रशिक्षण दिनुका साथै सम्बन्धित नृत्यको कार्यपत्र पनि प्रस्तुत गर्ने सहजकर्ता राजेश थापाले कार्यक्रममा बताउनु भयो । उहाका अनुसार कार्यशालामा ७ वटै प्रदेशबाट २४ जना नृत्य निर्देशक तथा कलाकारहरुले सहभागी हुनुभएको थियो । नेपाल संगीत तथा नाट्या प्रज्ञा प्रतिष्ठानकी प्राज्ञ परिषद सदस्य तथा नृत्य विभाग प्रमुख नमुना शर्माले एकले अर्कालाई सिक्न सिकाउनका लागि आफुहरुले नेपाल भरका नृत्यकारहरुलाई एकै थलोमा ल्याएको बताउनु भयो । 

सो कार्यक्रमलाई सम्बोधन गर्दै गण्डकी प्रदेश प्रज्ञा प्रतिष्ठानका उपकुलपति गोरे गुरुङले कार्यशालामा आफुले पनि धेरै कुरा सिक्ने विश्वास व्यक्त गर्नुभयो । पहिलो दिन मँगलबार प्रदेश १ बाट नृत्य निर्देशक नबिन्द्र राईले यो कार्यशालामा साकेला नृत्य सिकाउनु भयो । उहाले कार्यशालामा साकेलाको कार्यपत्र पनि सो क्रममा प्रस्तुत गर्नुभयो । यस्तै सो कार्यशालामा प्रदेश १ बाटै ओम प्रकाश बस्नेतले राजबँशी सुमदायको हुदु दुरा नृत्य सिकाउनु भयो । उहाले यो नृत्यको कार्यपत्र पनि प्रस्तुत गर्नुभयो । उहाले बुधबार सतार नृत्य र प्रदेश २ को सामा चखेवा नृत्य प्रशिक्षणसँगै कार्यपत्र पनि प्रस्तुत गर्नुहुनेछ । 

यो कार्यशालामा सुदुरपश्चिम प्रदेशबाट छलिया, हुड्केली नृत्य प्रशिक्षणसँगै कार्यपत्र प्रस्तुति कार्यक्रम रहेको सहजकर्ता राजेश थापाले जानकारी गराउनु भयो । यसैगरी कर्णाली प्रदेशबाट सरँग्या, पैंस्यारु र ट्याम्कुली नृत्य प्रशिक्षणसँगै यी नृत्यको कार्यपत्र प्रस्तुत गरिने भएको छ । लुम्बिनी प्रदेशबाट अनु रजकले थारु समुदायको बड्की र झर्रा नृत्य प्रशिक्षणसँगै कार्यपत्र प्रस्तुत गर्नुहुनेछ । 

कार्यशालामा गोरे गुरुङ, बमबहादुर गुरुङ, राजबहादुर गुरुङको समुहले गण्डकी प्रदेशबाट कृष्ण चरित्र, सोरठी, घाटु र कौडा नृत्यको कार्यपत्र प्रस्तुतसँगै नृत्य प्रशिक्षण दिनुहुनेछ । 

यस्तै प्रदेश ३ बाट भक्तपुरको राजारानी नृत्य प्रशिक्षण एवम् कार्यपत्र प्रस्तुत हुनेछ । प्रदेश ३ बाटै सुरेन्द्र देसार लिलतपुरको धिमे, घिन्तामै नृत्य प्रशिक्षण एवम् कार्यपत्र प्रस्तुत गर्नुहुनेछ । 




Artist Khabar Media Pvt. Ltd.
Gongabu, Kathmandu
Editor:Gopi Krishna Chapagain
सूचना विभाग दर्ता नंः २६७४/०७७-०७८
Contact: +9779851279301
Email: [email protected]