८ आश्विन २०८१, मंगलवार १७:०० 
काठमाडौँ । कलाकार सिताराम कट्टेल (धुर्मुस्)ले नयाँ चलचित्र ‘लाज शरणम्’को छायांकन सकाएर काठमाडौं फर्किएका छन् । उनले गएको साता डोल्पामा भएको छायांकनमा उनी उपस्थित थिए । उनी केहिदिन बसेर आफ्नो पार्टको छायांकन सकाएर काठमाडौं फर्किएका हुन् ।
आर्टिष्ट खबरलाई प्राप्त जानकारी अनुसार चलचित्रमा धुर्मुस्को केमियो (बिशेष तथा थोरै) भूमिका रहेको छ । उनी कस्तो भूमिकामा छन् भन्ने बारे गोप्य राखिएको छ । उनी चलचित्रमा छन् या छैनन् भन्ने बारे निर्माण टिमले कतै बोलेको थिएन । तर छायांकनको सेटबाट एक तस्बिर टिकटकमा सार्वजनिक भएको छ । तस्बिरमा धुर्मुस्सँगै चलचित्रको टिमबाट अर्जुन घिमिरे (पाँडे)लाई देख्न सकिन्छ ।
चलचित्र धुर्मुस्सँगै अर्जुन घिमिरे, मुकुन्द श्रेष्ठ, विजय बराल, कमलमणी नेपाल, महेश त्रिपाठी, हरिश निरौला, रेनुनाथ योगी, सागर लम्साल, बबिन राई, प्रियना आचार्य, माला लिम्बू लगायतका कलाकारहरुको अभिनय रहेको छ । चलचित्र आगामी फागुन १४ गते (शिवरात्री)बाट प्रदर्शनमा आउने भनिएको छ ।
