३ जेष्ठ २०८०, बुधबार १२:२१ 
जेठ, काठमाडौँ । चलचित्र विकास बोर्डले बार्षिक रुपमा प्रकाशन हुने प्राज्ञिक अनुसन्धानमूलक पुस्तक’ मञ्च’को आगामी अंकको लागि खोज तथा अनुसन्धानमूलक लेख, रचना माग गरेको छ । आफ्नो बेवसाइटमार्फत जेठ १ गते एक सूचना जारी गर्दै सूचना प्रकाशित भएको मितिले १५ दिन भित्र बोर्डमा उपलब्ध गराउनु हुन अनुरोध गरिएको छ ।
लेख पठाउँदा चलचित्रक्षेत्रको विकास, विस्तार र प्रवर्द्धनमा प्रत्यक्षरुपमा सहयोग पुग्ने किसिमको चलचित्र क्षेत्रसँग सम्बन्धित गतिविधि, खोज तथा अनुसन्धानमूलक पठाउनुपर्ने प्रकाशन समितिका संयोजक एवं बोर्ड सदस्य रविचन्द्र अधिकारीले बताउनुभयो । लेख रचना चलचित्रक्षेत्रसँग सम्बन्धित नीति, कानुनी व्यवस्था,चलचित्र निर्माण प्रदर्शन तथा वितरण, बक्स अफिस व्यवस्था, चलचित्र विकास बोर्डको भूमिका, स्वदेशी तथा विदेशी चलचित्र बजारको विद्यमान अवस्था, नेपाली चलचित्रक्षेत्रमा गर्नुपर्नै विविध पक्षको सुधार, चलचित्र जाँच सम्बन्धी विषय लगायतका चलचित्र क्षेत्रको विकास विस्तार र प्रवर्द्धनसँग प्रत्यक्ष सरोकार राख्ने किसिमको हुनुपर्ने अधिकारीले बताउनुभयो ।
प्राज्ञिक अनुसन्धानमूलक लेख रचनालाई प्राथमिकता दिईने र प्रत्येक लेख कम्तीमा पाँचहजार शब्दको हुनुपर्नेछ । कुनै पत्र पत्रिका अनलाईन लगायतका कुनै माध्याममा प्रकाशित भएको लेख रचनालाई मञ्चमा प्रकाशन नहुने तथा लेख रचनाहरु छनौट सम्बन्धि सर्वाधिकार बोर्डमा निहित हुनेछ । प्रकाशनको लागि छनौट भएका लेख रचनाको स्तर अनुसार लेखकलाई बोर्डबाट निर्णय भए बमोजिमको पारिश्रमिक उपलब्ध गराईनेछ । छनौटमा नपरेका लेखहरु सम्बन्धित लेखकलाई नै फिर्ता हुनेछन् ।
लेख रचनाको सफ्टकपी समेत बोर्डमा उपलब्ध गराउनुपर्ने तथा सफ्टकपी इमेल ठेगाना [email protected] मा समेत उपलब्ध गराउन सकिने बताईएको छ । आवश्यक जानकारीका लागि बोर्डको वेबसाइटfilm.gov.np तथा फोन नं ०१-४८२२८६० र मोबाईल नं. ९८४१२९२४७१ मा सम्पर्क गर्न सकिनेछ ।
