२२ आश्विन २०८०, सोमबार १२:१७ 
असोज, काठमाडौं । त्रिभुवन अन्तराष्ट्रिय विमानस्थलमा पुग्ने हो भने सधैजसो विदेश हिँड्नेको ताँती देखिन्छ । घाँटीमा माला र खादा लगाएका भर्खरका युवायुवती आँखाभरी आँशु बनाउँदै देश छाड्न लागिरहेका भेटिन्छन् । उनीहरुलाई हाँसोले विदाई गर्न भनेर विमानस्थलमा पुगेकाहरु पनि विछोडको पीडामा गहभरी आँशु बनाउँछन् ।
यही कथामा चलचित्र ‘परदेशी २’ तयार भएर प्रदर्शनको संघारमा छ । बडादशैँको अवसर पारेर यही शुक्रवारबाट देशैभर एकैपटक प्रदर्शनमा आउने चलचित्रले वर्तमान नेपाली समाजको घरघरको कथा बोल्ने निर्देशक नारायण रायमाझी बताउँछन् ।
‘अहिले सुनौलो भविष्यको कल्पना गर्दै युवापुस्ता विदेशिने जुन लहर छ, सोही कथामा चलचित्र बनेको छ । यससँग जोडिएका केही उपकथाहरु समेत छन्’ आइतवार राजधानीमा आयोजित पत्रकार सम्मेलनमा निर्देशक रायमाझीले भने, ‘यसभित्र बाबुआमाको कथालाई समेटने कोशिस गरिएको छ । गाउँ मिस गरेको एउटा परदेशीलाई समेटने कोशिस गरिएको छ । साथीसंगीको कथालाई समेटने कोशिस गरिएको छ । यसमा कतै पीडाहरु छन्, कतै उमंगहरु छन् । कतै मायाप्रेमका कुराहरु छन् । लामो समय लगाएर चलचित्रलाई राम्रो बनाउन सक्दो मेहनत गरेका छौं ।’
हामी यहाँ रहेकाहरुले परदेशको कल्पना गर्छौ तर परदेश यहाँबाट कल्पना गरेजस्तो छैन भनेर सचेत गराउने काम पनि चलचित्रले गर्ने उनले बताए ।
‘यहाँ रहेकाहरुले परदेशको कल्पना गरिरहेका होलान् । परदेशमा रहेकाहरुले देश सम्झिरहेका छन्’ रायमाझीले भने, ‘चलचित्रले परदेशमा नजाउ भनेर रोक्न त सक्दैन । तर, जो–जो जहाँ–जहाँ पुगेपनि, संसारको जुन कुनामा पुगेपनि आफ्नो माटो, देशलाई बिर्सिनु हुँदैन् भन्ने सन्देश दिएको छ ।’
यसभन्दा अगाडिका चलचित्र ‘गोर्खा पल्टन’ र ‘परदेशी’मा भएका कमीकमजोरीहरुलाई सुधार्दै ‘परदेशी २’लाई पूर्ण बनाएर ल्याएको रायमाझीले बताए ।
सांगीतिक क्षेत्रमा स्थापित गायक प्रकाश सपूत यही चलचित्रबाट अभिनेता बनेका छन् । पत्रकार सम्मेलनमा बोल्दै डेब्यू अभिनेता सपूतले चार वर्षअघि यो चलचित्रको छायांकन सेटमा काम गर्दै गर्दाको माहोल सम्झिए । ‘परदेशी २’को प्रदर्शन मिति नजिकिँदै गर्दा चलचित्रको हाइप राम्रो बनेको बताउँदै उनले खुशी व्यक्त गरे ।
चलचित्रको मुख्य पात्र आफू हुँदा चलचित्रलाई लिएर जिम्मेवारी बोध गरेको पनि उनले सुनाए । यो चलचित्रको छायांकनदेखि अहिलेसम्म आउँदा सपूतलाई अन्य केही चलचित्रहरुबाट समेत अफरहरु आएका थिए । यद्यपि, आफ्नो पहिलो चलचित्र ‘परदेशी २’ होस् भन्ने चाहनाले अरु चलचित्रमा काम नगरेको उनले स्पष्ट पारे ।
‘केही चलचित्रहरुबाट कुरा आएको थियो । त्यसमध्ये मैले पढेका वा रेस्पोन्स गरेका केही चलचित्रहरु बने । त्यसमध्ये केही चले, केही फ्लप समेत भए’ सपूतले भने, ‘तर मलाई मनैदेखि मेरो पहिलो चलचित्र परदेशी २ नै बनोस् भनेर पर्खिएको हुँ । किनकी यो चलचित्र र यसको टिमसँग मेरो छुट्टै एट्याजमेन्ट छ ।’
पत्रकार सम्मेलनमा अभिनेत्री वर्षा शिवाकोटी चलचित्रलाई लिएर एकदमै उत्साहित सुनिइन् ।
‘दशैंको माहोल पनि छ । यो दशैं चलचित्रले गर्दा अझ विशेष बन्न गईरहेको छ । चलचित्रलाई लिएर एकदमै उत्साहित छु’ उनले भनिन् । यस चलचित्रको कथा एवं पटकथा गीतकार समेत रहेका रमेश बिजीले लेखेका हुन् । आफ्नै देशको मौलिक कथामा चलचित्र बनेको बताउँदै माया पाउनेमा उनी विश्वस्त देखिए । निर्माता राजेश वंशलले दशैंको माहोलमा प्रदर्शनमा आउने चलचित्रले दर्शकको मन जित्ने विश्वास व्यक्त गरे ।
८ वर्षअघि प्रदर्शनमा आएको सुपरहिट चलचित्र ‘परदेशी’को दोस्रो श्रृङखलाका रुपमा प्रदर्शनमा आउन लागेको ‘परदेशी २ मा प्रकाश र वर्षाका साथमा केकी अधिकारी, प्रशान्त तामाङ, दिलीप रायमाझी, रमा थपलिया, सबिन बास्तोला, नीर शाह, देवेन्द्र बब्लु, रोशनी कार्कीलगायतको समेत अभिनय छ ।
