७ बैशाख २०८१, शुक्रबार ११:५५ 
बैशाख, काठमाडौं । अनमोल केसी स्टारर चलचित्र ‘फर्की फर्की’को ट्रेलर सार्वजनिक गरिएको छ । काठमाडौंमा एक कार्यक्रमको आयोजना गर्दै निर्माण कम्पनिले फिल्मको पहिलो ट्रेलर सार्वजनिक गरेको हो । बुद्ध जयन्तीको अबसरमा आगामी जेठ १० गतेबाट फिल्म दर्शकमाझ आउँदैछ ।
ट्रेलरमा चलचित्रका प्रमुख कलाकार अनमोलसँगै अभिनेत्री जसीता गुरुङ, डेब्यू कलाकारद्वय रवी काफ्ले र समृद्धि अर्याल लगायतका कलाकार फिचर्ड छन् । उच्च मेकिङ र पछिल्लो समय दर्शकमाझ आएका फिल्महरूभन्दा भिन्न स्वाद चलचित्रले पस्केको ट्रेलरमा देखिन्छ । लभस्टोरी जनरामा सर्वाधिक रुचाइएका अनमोल र अभिनेत्री जसीताको सुन्दर केमेस्ट्रि देखाइएको छ ।
कार्यक्रममा बोल्दै अनमोलले आफ्नो करियरको दशौं वर्ष र यो चलचित्र पनि आफ्नो दशौं फिल्म भएको भन्दै आफ्नो लागि ुफर्की फर्कीु विशेष रहेको बताए । अभिनेत्री जसीताले अनमोलसँग पहिलोपटक काम गर्न पाएकोमा खुशी व्यक्त गरिन् । यो चलचित्रआफ्नो लागि डेब्यू जस्तै रहेको र निकै मेहनत गरेको उनको भनाई छ ।
शाहिल खानले चलचित्रको ट्रेलर तयार पारेका हुन् । प्रेम, रोमान्स र ‘टाइम ट्राभल’को कथा चलचित्रले बोल्ने संकेत ट्रेलरले गरेको छ । यो फिल्म वर्ष २०८१ को प्रतिक्षित फिल्म मध्येको एक हो ।
रोहित अधिकारी फिल्मस्को प्रस्तुति र ओएसआर डिजिटलको सहकार्यमा निर्माण भएको चलचित्रलाई सुयोग गुरुङले निर्देशन गरेका हुन् । ओमप्रकाश अग्रवाल निर्माता रहेको चलचित्रमा मनोज वली र रामु न्यौपाने सह–निर्माताको रुपमा छन् । यो चलचित्रमा अरुण रिजालको पनि लगानी छ ।
चलचित्र ‘फर्की फर्की’मा सुरेन्द्र पौडेलको सम्पादन छ भने रोमन न्यौपाने र नरेन लिम्बुको संगीत रहँदा छायांकन नरेन्द्र मैनालीको छ । सुयोग गुरुङको पटकथा र किरण थापाको कोरियोग्राफी छ । प्रोडक्सन हेड शंकर पाण्डे हुन् ।
