१ भाद्र २०८१, शनिबार ११:११ 
काठमाडौँ । नयाँ चलचित्र ‘वर एण्ड वधु’को ट्रेलर सार्वजनिक गरिएको छ । यहि भदौको १४ गतेबाट रिलिजमा आउन लागेको यो चलचित्रको सार्वजनिक ट्रेलरमा लभ, रोमान्स, धोका, कमेडी र एक्सनले भरिएको देख्न सकिन्छ ।
मिलन चाम्सको निर्देशनमा तयार भएको यो चलचित्रमा जानुका थापाको लगानी छ । अमित रिजाल कार्यकारी निर्माता रहेको चलचित्रलाई एलआरके प्रोडक्सनको प्रस्तुतिमा तयार पारिएको हो ।
सुदिप बरालको डीओपी रहेको चलचित्रमा मिलन श्रेष्ठको सम्पादन, साहिल खानको ट्रेलर, हिमाल केसीको एक्सन, प्रदीप भारद्धाजको लेखन, रविन्द्र न्यौपाने र अनिस स्याङ्देनको कोरियोग्राफी, सन्तोष लामाको कला निर्देशन, अर्जुन पोखरेलको संगीत छ ।
यो चलचित्रमा आँचल शर्मा, विवेक कर्माचार्य, गरिमा शर्मा, विजु पार्की, किरण केसी, सरिता लामिछाने, कुसुम शर्मा, श्रृष्टी खड्का, हिमेश पन्त, दिनेश काफ्ले, यमन श्रेष्ठ, रविन्द्र खड्का, अंशु महर्जन र सिता न्यौपानेको अभिनय छ ।
चलचित्र ‘वर एण्ड वधु’को ट्रेलरमा विशेषगरि, आँचल र विवेकबिचको रोमान्स, लभ, धोका देखाइएको छ । चलचित्रको ट्रेलर रिलिज कार्यक्रममा बोल्दै कलाकार किरण केसीले आफूले काम गरेका एक सय बढी फिल्ममध्ये यो फिल्म एक–दुई नम्बरमा पर्ने बताए ।
यस्तै, निर्देशक मिलन चाम्सले पनि फिल्म दर्शकलाई मनपर्ने विश्वास व्यक्त गरे । नायक विवेक कर्माचार्यले फिल्मका लागि निकै मिहिनेत गरेको भन्दै सबै खालको भूमिका निर्वाह गर्न सहज लागेको तर्क गरे । नायिका आँचल शर्मा फिल्म ‘वर एण्ड वधु’ दर्शकका लागि विशेष खुराक हुने बताइन् ।
चलचित्र को ट्रेलरमा उच्च क्यानभास देखाइएको छ । नेपाल र रोमानियाको लोकेशनमा खिचिएको यो चलचित्रले दर्शकलाई हलसम्म तान्ने विश्वास गरिएको छ ।
