२० भाद्र २०८१, बिहीबार १४:४५ 
काठमाडौँ । भोली (शुक्रबार)बाट प्रदर्शनमा आउने चलचित्र देवीको प्रिमियर सम्पन्न भएको छ । तीजको अवसरमा प्रदर्शन हुने यो चलचित्रको प्रिमियर शो कमलपोखरी सिटी सेन्टरस्थित बिग मूभिज हलमा राखिएको थियो । जसमा सिनेमाकर्मी र पत्रकारको उपस्थित थिए ।
चलचित्र हेर्न अभिनेता कर्मा शाक्य, गजित बिष्ट, विशाल पहारी, अभिनेत्री मेनुका प्रधान, सृष्टि श्रेष्ठ, लुनिभा तुलाधर र निर्देशक सौरभ चौधरीका साथमा सिनेमा मुख्य कलाकारहरु शिल्पा मास्के, नाजिर हुसेन, गौरव पहारी, निरिक्षा घतानी र निर्देशक संजोग राई लगायत हल पुगेका थिए । प्रिमियरमा चलचित्र हेरेका अधिकांशले सिनेमा उत्कृष्ट बनेकाले यो सिनेमा ठुलो माससम्म पुग्न जरुरी भएको प्रतिक्रिया दिए ।
चलचित्र हेरेपछि निर्देशक सौरभ चौधरीले सिनेमा निकै राम्रो बनेको भन्दै ‘देवी’ जस्तो कन्टेन्ट बेसको सिनेमा निर्माण गर्ने हरेक मेभरको सपना हुने बताए । समाज र देशमा भैरहेको बलात्कारका घटना र त्यसमा देखिने कानुनको प्रभावलाई सिनेमाले सुक्ष्म रुपमा उठाएकाले सवै कलाकारले आफ्नो भुमिकालाई न्याय दिनु भएको छ । सिनेमा हेरिरहँदा कहिँकतै पनि अस्वभाविक लाग्दैन् ।
अभिनेत्री सृष्टि श्रेष्ठले पनि सिनेमाको बिषयवस्तुले भावुक बनाएको बताइन् । नेपालमा बलात्कार र महिला हिंसाको कानुन बलियो छ । तर, त्यसको प्रभावकारी कार्यन्वयनको जरुरी रहेकाले ुदेवीु जस्ता चलचित्रले सरकारलाई घचघचाउन सफल हुने विश्वास व्यक्त गरिन् । अभिनेत्रीद्धय लुनिभा तुलाधर र मेनुका प्रधानले पनि सिनेमा उत्कृष्ट बनेको भन्दा यस्ता सिनेमालाई धेरै भन्दा धेरै दर्शकले हेरेर बहसको रुपमा लैजानु पर्ने बताए ।
अभिनेता कर्मा शाक्यले पनि ‘देवी’ले गहन बिषयलाई उत्कृष्ट ढंगले प्रस्तुत गरेकाले आफ्नो मन छोएको बताए । चलचित्रका मुख्य कलाकारहरु र निर्देशकले पनि आफुहरुको पाँच वर्ष लामो परिश्रम प्रिमियरमा मिलेको प्रतिक्रियाले सफल भएको अनुभव दिएको सुनाए । निर्देशक राईले त हल रिलिज पश्चात नेपालमा विभिन्न ठाउँमा चलचित्र देखाएर समाजलाई जागृत गराउने तयारी समेत रहेको बताए ।
क्राइम थ्रिलर जनरामा निर्माण भएको चलचित्रका निर्देशक सञ्जोग राई हुन् । चलचित्रको कथा निर्देशक राईले अजय गौतमसँग मिलेर लेखेका छन् । एक्जिबिट स्टुडियोको प्रस्तुतिमा चलचित्र ‘देवी’ बनेका हो । यो चलचित्र निर्माण टिमले सार्वजनिक प्रदर्शनका लागि बाँसुरी फिल्म्ससँगको सहकार्य गरेको छ ।
चलचित्रमा शिल्पा मास्के, गौरव पहारी, नाजिर हुसेन, टीका पहारी, प्रभाकर न्यौपाने, ध्रुब कोइराला, निरिक्षा घतानी, विशाल पहारी, निरु खड्का, जीवन जंग खड्का र विकास पन्तको अभिनय रहेको छ । सन्जेन थापाको चलचित्रमा एक्सन रहेको छ ।
रेमन गुरुङ र सञ्जोग राईको निर्माण रहेको चलचित्रको कार्यकारी निर्माता जावेद खान तथा सह(निर्माता शिल्पा मास्के, उजेन नोर्वे गुरुङ, नारायण गुरुङ र मिलन लामा हुन् । जोएल फ्रोमको डिओपी रहेको चलचित्रलाई मनोज राठी र उज्वल पौडेलले वितरण गर्दैछन् ।
