२७ भाद्र २०८१, बिहीबार १४:२८ 
गोपिकृष्ण चापागाईं/ काठमाडौँ । यसबर्षको ‘मिस युनिभर्स नेपाल‘को उपाधि सम्पदा घिमिरेले जितेकी छिन् । बुधबार बेलुका ललितपुरको गोदावरीस्थित सनराइज कन्भेन्सन सेन्टरमा सम्पन्न भएको ‘मिस युनिभर्स नेपाल २०२४’ मा सम्पदाले टाइटल जितेसँगै अन्य चारजना उप बिजेता बने ।
बिजेता सम्पदालाई आयोजक संस्था ग्लोबल ग्ल्यामरकी प्रमुख संगीता पुरीले ताज लगाइदिएकी थिइन् । योसँगै विजेता सम्पदाले मेक्सिकोमा हुने मिस युनिभर्समा नेपालको प्रतिनिधित्व गर्नेछिन् ।
यस वर्षको मिस युनिभर्स नेपालमा स्मृति सिंह फर्स्ट रनरअप, अक्षिता क्षेत्री सेकेन्ड रनरअप, क्यारिन मुर्रे थर्ड रनरअप र सुजल बम फोर्थ रनरअप भएकी छन् । फिनालेमा उपाधिका लागि उत्कृष्ट २२ प्रतिस्पर्धीबीच प्रतिस्पर्धा भएको थियो ।
दुईबर्षदेखीको मिहिनतको फल पाएँः बिजेता सम्पदा घिमिरे
बिजेता सम्पदा घिमिरेले टाइटल जितेसँगै आर्टिष्ट खबरसँग संक्षिप्त कुरा गर्दै दुईबर्षदेखीको मिहिनतको फल पाएको भन्दै खुसी ब्यक्त गरिन् । उनले आफू १७ बर्ष हुँदा देखी नै बिभिन्न क्षेत्रबाट समाजसेवा गर्दै आएको र आगामी दिनमा पनि समाजसेवामै लाग्ने बताइन् । उनले भनेकी छिन्, ‘मेरो बोलीले समाजमा केहि न केहि सकारात्मक प्रभाव पारोस्, युवाहरुले केहि न केहि सिकुन् भन्ने चाहान्छु । साथै मेक्सिकोमा हुने मिस युनिभर्समार्फत नेपाललाई चिनाउन चाहान्छु ।’ साथै फिल्म वा म्युजिक भिडिओको मोडलिङमा कत्तिको रुचि छ भन्ने प्रश्नमा अघि भन्छिन्, ‘मैले अहिलेपनि केहि मोडलिङ त गर्दै आएकी छु तर त्यस्तो मोडलिङमै लागिरहने वा फिल्मको अभिनयमा लाग्ने भन्ने रुचि छैन । मलाई फेशन, रन वेमै रुचि छ ।’
Video: Click Here
