६ फाल्गुन २०८१, मंगलवार १४:४५ 
काठमाडौँ । अभिनेता राजेश हमाललाई ‘मनास्लु कलाकारिता सम्मान’ प्रदान गरिएको छ । मनास्लु वर्ल्ड कलेजले आयोजना गरेको कार्यक्रममा हमाललाई सम्मान प्रदान गरिएको हो । चुच्चेपाटि चाबहिल स्थित मनास्लु वर्ल्ड कलेजले कक्षा ११ मा भर्ना भएका विद्यार्थीहरूलाई स्वागत तथा विशिष्ट व्यक्तित्वलाई सम्मान तथा सांस्कृतिक कार्यक्रम २०८१ आइतबार नेपाल प्रज्ञा प्रतिष्ठानको हल कमलादीमा भव्य कार्यक्रम सम्पन्न गरेको थियो ।
कार्यक्रममा अभिनेता हमालले युवा अवस्थामा मिहिनत गरेका पढ्न उपस्थित बिद्यार्थीहरुलाई सुझाव दिएका थिए । उनले आफ्नो बाल्यकाल सम्झँदै समयमा मेहनत गरे अवश्य फल प्राप्त हुने धारणा राखेका थिए । यो समय तपाईहरुको मिहिनत गर्ने समय हो । हामीले अब तपाईहरुको जस्तो समय पाउँदैनौं, त्यसैले यो समयलाई सदुपयोग गर्नुहोस् ।, हमालले भने । कार्यक्रममा हमालसँगै राजेन्द्र बानियाँलाई मनास्लु सञ्चारकर्मी सम्मान २०८१ , अनुराधा कोइरालालाई मनास्लु समाजसेवी सम्मान २०८१, किरण कुमार चेम्जोङ लिम्बुलाई मनास्लु खेलाडी सम्मान २०८१ र प्रा.डा बालचन्द्र लुइँटेललाई मनास्लु शिक्षासेवि सम्मान २०८१ प्रदान गरिएको थियो ।
मनास्लु वर्ल्ड कलेजका अध्यक्ष गेन्द्र लामाको सभापतित्वमा भएको कार्यक्रमको प्रमुख अतिथिको रूपमा उप प्रधान तथा सहरी विकास मन्त्री प्रकाशमान सिंह रहेका थिए । कार्यक्रमको सञ्चालन पूर्व मिस नेपाल माल्भिका सुब्बाले गर्नु भएको थियो । कार्यक्रममा बोल्दै प्रमुख अतिथि उप प्रधान तथा सहरी विकास मन्त्री प्रकाशमान सिंहले दक्ष जनशक्ति नेपालमै रोक्न सरकार कटिबद्ध रहेको बताए । युवाहरूको विदेश पलायन प्रति चिन्ता व्यक्त गर्दै स्वदेशमै प्रविधिको साहयताले गुणस्तरीय शिक्षा र रोजगारीका अवसरहरू सृजना गर्न सकिने धारणा राखे ।
मनास्लु वर्ल्ड कलेजलेले गरेको तिन महत्त्वपूर्ण प्रतियोगिताहरू ‘मनास्लु आइडल २०८१ को ग्राण्ड फिनाले , ‘मनास्लु डान्सिङ स्टार २०८१ को ग्राण्ड फिनाले र ‘मिस्टर एन्ड मिस २०८१ को ग्राण्ड फिनाले समेत गरेको थियो । कार्यक्रममा गायक कुमा सागर , डान्सर तोरिया मगर , गायिका शान्ता रानी परियार देखी कर्ण राज गिरिले प्रस्तुति दिएका थिए ।
त्यस्तै कार्यक्रममा मनास्लु वल्र्ड कलेजमा अध्यापनरत शिक्षकहरू मध्य कार्यसम्पादनको आधारमा उत्कृष्ट ६ जना शिक्षक र शिक्षिका तथा कर्मचारीहरूलाई सम्मान गरिएको थियो भने २०८१ सालमा लिइएको कक्षा ११ को बोर्ड परीक्षामा कलेज टपर , कलेज सेकेन्ड टपर , कलेज थर्ड टपर तथा विभिन्न उत्कृष्ट अङ्क हासिल गर्ने उत्कृष्ट १२ जना विद्यार्थीलाई मनास्लु एकेडेमिक अचिभमेन्ट अवार्ड द्वारा सम्मानित भएका छन् ।
मनास्लु वर्ल्ड कलेजका प्रिन्सिपल राजन श्रेष्ठले आफ्नो मनतब्य राख्दै राज्यले सम्मान गर्नुपर्ने विशिष्ट ब्यक्तित्वहरुलाई सम्मान गर्न पाउँदा आफूलाई खुसी लागेको बताए । कार्यक्रमका सभापति तथा कलेजका अध्यक्ष गेन्द्र लामाले हातमा सर्टिफिकेट मात्र हैन कुनै न कुनै विषयमा वा विद्यार्थीले चाहेको विषयमा निपुर्ण बनाएर यो समाजलाई आवश्यक जनशक्ति उत्पादन गर्ने लक्ष्य लिएर कलेजले कार्यक्रम बनाई रहेको बताएका थिए ।
