९ चैत्र २०८१, आईतवार १३:२२ 
काठमाडौँ । चर्चित भारतीय अभिनेता सुशान्त सिंह राजपूतको मृत्यु प्रकरणमा केन्द्रीय अनुसन्धान ब्यूरो (सीबीआई) ले अन्तिम प्रतिवेदन तयार गरेको छ।रातपूतको मृत्यु प्रकरणमा चार वर्ष ६ महिना १५ दिनपछि सीबीआईले अन्तिम प्रतिवेदन रिपोर्ट मुम्बईको विशेष अदालतमा बुझाएको हो। सीआईबीको अनुसन्धानले सुशान्तलाई आत्महत्या गर्न उक्साएको कुनै प्रमाण नभेटिएको उल्लेख गरेको छ। साथै सुशान्तकी प्रेमिका रिया चक्रवतीलाई यस मुद्दामा क्लिन चिट दिएको पनि भारतीय सञ्चारमाध्यमहरुले उल्लेख गरेका छन्।
१४ जुन २०२० मा सुशान्त बान्द्रास्थित आफ्नै घरमा मृत फेला परेका थिए। मिडिया र विपक्षी दलहरूको दबाबका कारण यस मुद्दाको अनुसन्धान सीबीआईलाई सुम्पिएको थियो। अब सीबीआईको अन्तिम रिपोर्टमा मृत्युको वास्तविक कारण आत्महत्या भनिएको छ। यस मुद्दामा सुशान्तकी प्रेमिका रियाले २७ दिन जेलमा बस्नुपरेको थियो। सीबीआईको अन्तिम प्रतिवेदन सार्वजनिक भएपछि, रियाका वकिल सतीश मानेशिन्देले एक विज्ञप्ति जारी गर्दै यस मुद्दामा धेरै झूटा कथाहरू बनाइएको बताए।
सुशान्तका बुबा केके सिंहले रिया चक्रवर्तीविरुद्ध आत्महत्या गर्न दुरुत्साहन, ठगी र मनी लन्ड्रिङको आरोप लगाउँदै उजुरी दिएका थिए। रियाले पनि सुशान्तको परिवारमाथि मानसिक उत्पीडनको आरोप लगाएकी थिइन्। सुशान्तको मृत्यु हुनुभन्दा केही दिनअघि उनकी म्यानेजर दिशा सालियनको मुम्बईको मलाडमा रहेको एक भवनको १४ औं तलाबाट खसेर मृत्यु भएको थियो। यी दुवै मृत्युलाई शंकास्पद मानिएको थियो। अब यो प्रतिवेदन स्वीकृत गर्ने वा थप अनुसन्धानको आदेश दिने भन्ने निर्णय अदालतले गर्नेछ।
