
काठमाडौं । गायक तथा अभिनेता प्रकाश सपुतको डेब्यु निर्देशन रहेको फिल्म ‘वसन्त’को गीत ‘हेर्दै आँखामा’ सार्वजनिक भएको छ । नेपालका विभिन्न आकर्षक थलोसहित भारतको गोवामा छायांकन गरिएको गीतमा सपुत र स्वस्तिमा खड्का रोमान्टिक रुपमा प्रस्तुत छन् ।
गीतमा मुख्य पात्र वसन्तले विभिन्न धर्म र संस्कार अनुसार विवाह गरेको देखाइएको छ । यसले कथा र मर्मलाई चित्रण गर्ने भनिएको छ । गीतमा सुगम पोखरेल र समीक्षा अधिकारीले स्वर दिएका छन् । सपुतको शब्द रचना र संगीत तथा योगेश काजीको संगीत संयोजन छ । सुसन प्रजापतिको छायांकन, केविका खत्रीको नृत्य र प्रवीण भट्टको सम्पादन छ । यो फिल्म चैत २२ गतेदेखि प्रदर्शन तयारीमा छ ।
गलबन्दी प्रोडक्सनको प्रस्तुति रहने सोसल ड्रामा फिल्मको निर्मातामा मोहन विश्वकर्मा र बिन्दु बोहोरा तथा कार्यकारी निर्मातामा अनुरोध भट्टराई, नाना थकाली र वीरेन्द्रनारायण श्रेष्ठ छन् ।