१९ चैत्र २०८१, मंगलवार १०:५० 
काठमाडौं । गायक आनन्द कार्की अस्ट्रेलियाको सिड्नीमा गुञ्जिने भएका छन् । चैत २८ गते (अप्रिल १०) मा स्थानीय मेरिल्याण्डको बार्दली फङ्सन सेन्टरमा ‘आनन्द कार्की समुधर साँझ’ आयोजना हुने भएको छ । पाल्पा इन्टरटेनमेन्टले आयोजना गर्ने कार्यक्रममा कार्कीले आफ्ना चर्चित गीतमार्फत दर्शकलाई झुमाउनेछन् । आधुनिक तथा फिल्मी गायनमा चर्चित कार्की जनम जनम जिउँला सँगै, यी हल्लाहरू हुन् तिमीले सुनेका, लाग्छ मन हेरिरहुँ, सुन सुन मायालु जोडी हो, जिन्दगी बाँच्नु छ दुईचार दिन, संसार यो बनेको छ, भरे आउँछु सपनीमा जस्ता गीतका लागि परिचित छन् ।
कार्कीले २ घण्टा प्रस्तुति दिने तय छ । कार्यक्रममा गायिका प्रीति घिमिरेले प्रस्तुति दिनेछिन् । फिल्म निर्देशक शोभित बस्नेतले कार्यक्रम होस्ट गर्नेछन् । बस्नेत आगामी फिल्म ‘पीआर’ छायांकनको लागि सिड्नीमा छन् । सांगीतिक कार्यक्रमका लागि ५५ अष्ट्रेलियन डलर शुल्क तोकिएको छ ।
कार्कीले गायक दुर्गेश थापासँग पछिल्लो सुपरहिट गीत ‘दुश्मन हेरेको हेर्यै’मा सहकार्य गरेका छन्, जुन अहिले युट्युबको ग्लोबल ट्रेन्डिङमा छ । युट्युब म्युजिकका अनुसार गायक कार्की मार्च महिनामा यो प्लाटफर्ममा नेपालभित्र धेरै हेरिने सुनिने संगीतकर्मी सूचीको आठौं स्थानमा छन् ।
