२० चैत्र २०८१, बुधबार १०:२० 
काठमाडौं । फिल्म ‘लाज शरणम्’ मा कुपोषित बालकको भूमिकामा अभिनय गरेका कलाकार विकास केसीको नीधन भएको छ । उनको कुपोषणकै कारण मृत्यु भएको हो । वि.सं. २०६६ साउन १ मा जन्मिएका केसीको जाजरकोटस्थित घरमै मंगलबार निधन भएको हो । फिल्ममा कुपोषित र कर्णाली क्षेत्रकै बालकले चरित्रमा देखिएका केसी वास्तवमै कुपोषित र कर्णाली क्षेत्रका बासिन्दा थिए । उनको जटिल कुपोषणको उपचारका लागि सुटिङपछि ग्रिन सिटी अस्पताल, काठमाडौँ ल्याइएको थियो । अस्पतालले कान्ति बाल अस्पताल रिफर गरे पनि त्यहाँ उपचार सम्भव नभएको भन्दै उनलाई कर्णाली फर्काइएको थियो ।
निर्माता तथा कलाकार अर्जुन घिमिरे पाँडेका अनुसार विकासको निधनपछि उनलाई अन्तिम श्रद्धाञ्जली र उनको परिवारलाई साथ दिन बुधबार जाजरकोट जाने कार्यक्रम छ । निर्देशक कट्टेल, कलाकार पाँडे, त्रिपाठी, योगी त्यसतर्फ जाँदैछन् । विकासको उपचारमा फिल्मको छायांकन र त्यसपछि पनि निकै प्रयास गरिएको पाँडेले बताए । उनलाई उपचारार्थ काठमाडौंसम्म ल्याइएको थियो । निर्माताले स्थानीय सरकार र परिवारसँग अनुमति लिएरै विकासलाई फिल्म खेलाएका थिए ।
उनको निधनको खबर लाज शरणम् टिमले सामाजिक संजालबाट सेयर गरिरहेका छन् । कुपोषणको यो विषयलाई पाँडे, जिग्रीले फिल्ममार्फत ध्यानाकर्षण गराउन चाहेको लेखेका छन् ।‘ नेपालबाट कुपोषण हटाउन कला क्षेत्रबाट हामीले पूरा गर्नुपर्ने दायित्व सदैव निर्वाह गरिरहनेछौँ’ । जेपीटी क्रिएसनले निर्माण गरेको फिल्म ‘लाज शरणम्’ अहिले पनि हलमा प्रदर्शन भैरहेको छ ।
