२० चैत्र २०८१, बुधबार ११:४७ 
काठमाडौँ । साहित्य, संगीत, कला, संस्कृति र विविध विधामा योगदान दिने युवालाई ‘नारायणगोपाल संगीत पुरस्कार २०८१’ प्रदान गरिने भएको छ । राष्ट्रिय युवा सेवा कोषले श्रम, सीप, सदाचार र सेवाभाव जगाउने उद्देश्यले पुरस्कार प्रदान गर्ने जनाएको हो ।
पुरस्कारको लागि यसवर्ष छनोट भएका १० जनामध्येबाट एकलाई नगद पुरस्कार र प्रमाणपत्र प्रदान गरिने भएको छ । नेपाली संगीतको उन्नति तथा प्रतिष्ठानमा महत्वपूर्ण योगदान पुर्याएका स्रष्टाको सम्मानार्थ पुरस्कार प्रदान गर्न लागिएको कोषले विज्ञप्तिमार्फत जनाएको छ ।
चैत २४ गते पर्यटन बोर्डको सभाकक्षमा हुने समारोहमा पुरस्कार वितरण गरिने भएको छ । कोषले नेपाली युवालाई कला, संस्कृति र संगीतप्रति आकर्षित गराउन र नेपाली संगीत क्षेत्रको प्रवर्धन कार्यमा सक्रियता जनाइरहेको छ । अन्तर्राष्ट्रिय युवा वर्ष १९८५ को आदर्श सिद्धान्त र कार्यक्रमलाई निरन्तरता प्रदान गर्न राष्ट्रिय युवा सेवा कोष २०४२ माघ १६ गते स्थापना गरिएको जनाइएको छ ।
