११ कार्तिक २०८२, मंगलवार ०७:२१ 
काठमाडौँ । भर्खर अमेरिकाको लामो टुर सकाएर नेपाल फर्किएकी गायिका एलिना चौहानले आयोजकप्रति असन्तुष्टि ब्यक्त गरेकी छिन् । उनले जस्तो छ त्यस्तै भन्छु भन्दै कलाकार सम्मान होइन नोकरझैं ब्यवहार गरियो भन्दै फेसबुक मार्फत स्टाटस लेखेकी छिन् । उनले लेखेकी छिन्, कलाकारलाई सम्मान होइन, नोकरझैँ व्यवहार गरियो। कसैले कैदीझैँ महसुस गर्यो, कसैले अपमान सहनु पर्यो। गायिका चौहानले आयोजकप्रति आक्रोश ब्यक्त गरेकी छिन् ।
उक्त टुरमा गायिका चौहानसँगै गायक बद्री पंगेनी, प्रताप दास र गायिका कला लम्साल सँगै गएका थिए । गायिका कला लम्सालले अमेरिका पुगेकी केहि समयमै आयोजकप्रति असन्तुष्टि ब्यक्त गर्दै फर्किएकी थिइन् भने गायक पंगेनी र दास भने केहि बोलेका छैनन्।
उनले लेखेको पुरा स्टाटस यस्तो छ,
”जस्तो छ, त्यस्तै भन्छु — यो टुर मेरो लागि ठूलो सिकाइ बन्यो।
कलाकारलाई सम्मान होइन, नोकरझैँ व्यवहार गरियो। कसैले कैदीझैँ महसुस गर्यो, कसैले अपमान सहनु पर्यो। 
एउटा कुरा स्पष्ट भन्न चाहन्छु आयोजक भनेको कलाकारको संरक्षक हो, मालिक होइन।
कलाकारले धनभन्दा बढी इज्जत, व्यवहार र कदर खोज्छ।
नराम्रा अनुभवले धेरै कुरा सिकायो — अब कुनै कलाकारले यस्तो अपमान भोग्न नपरोस् 
”
