२३ मंसिर २०८२, मंगलवार २१:२५ 
काठमाडौँ – शुक्रबार रिलिजको तयारीमा रहेको फिल्म ‘पीआर’ ले आफ्नो टाइटल गीत ‘पीआर को चक्करले’ सार्वजनिक गर्दै दर्शकको ध्यान कथाभन्दा पहिलेनै पात्रहरूको भावनात्मक यात्रातर्फ मोडिदिएको छ।
गीतको भिडियोमा देखिने आर ए सुरज पौडेल, विनिता कार्की, राजन कुँवर, पूजा चौधरी र आश्मा अधिकारी केवल ग्ल्यामरस फ्रेममा सीमित छैनन्—गीतले उनीहरूको आप्रवासनसँग जोडिएको मनोवैज्ञानिक द्वन्द्व र सम्बन्धको उल्झनलाई संकेतजस्तै प्रस्तुत गरेको छ। गीतमा मानस राजको संगीत तथा मानस राज–समिक्षा अधिकारीको स्वरले यही द्वन्द्वलाई भावनात्मक बनाएको छ।
सलोन सलिना फिल्म्सको ब्यानरमा बनेको ‘पीआर’ ले बाहिरी चमकभन्दा पर, विदेश जाने नेपाली युवाको सपना, सामाजिक दबाब, सम्बन्धमा पर्ने दरार र नयाँ जीवन पाउने आशाको गहिरो मिश्रण बोकेको छ। निर्माताहरू लक्ष्मण सापकोटा र प्रदीप दाहालले पछिल्लो समय भनेभन्दा बढी युवाले झेलिरहेको ‘विदेश जाने दवाव’ र त्यसले जन्माउने व्यक्तिगत संघर्षलाई कथा केन्द्रमा राखेको बताउँछन्।
फिल्ममा आर ए सुरज पौडेलदेखि विनिता कार्की र आश्मा अधिकारीसम्म, सबै कलाकारले आप्रवासनको वास्तविकता र भावनालाई दर्शकले नजिकबाट महसुस गर्ने अभिनय गरेकाको निर्माण पक्षको दाबी छ। त्यस्तै, नीर शाह, गौरी मल्ल र रविन्द्र खड्का जस्ता अनुभवी कलाकारको विशेष उपस्थितिले कथालाई थप वजनी बनाउने अपेक्षा गरिएको छ।
निर्देशक शोभित बस्नेतका अनुसार, “गीत मात्र टिजर हो—फिल्मले रोमान्स, एक्सन र सामाजिक सन्देशलाई एउटै धागोले बाँधेर प्रस्तुत गर्नेछ।”
गीत युट्युबमा सार्वजनिक भएलगत्तै दर्शकको प्रतिक्रिया आउन थालेका छन्, र फिल्मले उठाएको विषयवस्तुले दर्शकलाई व्यक्तिगत अनुभूति र समाजको वास्तविकता दुवैसँग जोड्ने अनुमान गरिएको छ।
