२९ मंसिर २०८२, सोमबार १८:२७ 
काठमाडौँ । नेपाली सांगीतिक क्षेत्रमा नयाँ र आकर्षक सिर्जनाका रूपमा गायक राजु तोलाङ्गी गुरुङ र चर्चित गायिका मेलिना राईको आवाजमा सजिएको गीत ‘ख्याल ख्याल ठट्टैमा’ सार्वजनिक भएको छोटो समयमै दर्शक–श्रोतामाझ लोकप्रिय बन्न सफल भएको छ। गीत रिलिज भएसँगै सामाजिक सञ्जाल तथा डिजिटल प्लेटफर्ममा तीव्र रूपमा फैलिँदै चर्चा बटुलिरहेको छ।
गीतकार तथा संगीतकार टेक गुरुङको शब्द र संगीतमा तयार भएको यस गीतले प्रेम, रमाइलोपन र हल्का ठट्टाको भावलाई सुन्दर रूपमा प्रस्तुत गरेको छ। विदेशलाई कर्मथलो बनाउँदै आएका टेक गुरुङले जन्मभूमि नेपाल र नेपाली कला–संस्कृतिप्रतिको आफ्नो गहिरो माया यस गीतमार्फत पनि देखाएका छन्। अमेरिकामा रहेर पनि निरन्तर संगीत सिर्जनामा सक्रिय उनी मन माया फाउन्डेसनका निर्देशक हुनुका साथै युनाइटेड गुरुङ सोसाइटी अफ अमेरिकामा आबद्ध रहँदै सामाजिक तथा सांस्कृतिक गतिविधिमा योगदान दिँदै आएका छन्।
गीतको भिडियो पक्ष पनि दर्शकमाझ उत्तिकै प्रभावशाली बनेको छ। चर्चित अभिनेता पल शाह र अभिनेत्री चाहना पुन मगरको आकर्षक नृत्य तथा अभिनयले गीतलाई थप जीवन्त बनाएको छ। पर्दामा उनीहरूको केमेस्ट्रीले दर्शकको ध्यान तानेको छ भने गीतको भावलाई दृश्यात्मक रूपमा बलियो बनाएको छ।
प्राविधिक पक्षमा पनि ‘ख्याल ख्याल ठट्टैमा’ सबल देखिन्छ। संगीत संयोजन सागर बिरहीले गरेका छन् भने मिक्सिङ तथा मास्टरिङ खडक बजुरालीको रहेको छ। भिडियो निर्देशन तथा कोरियोग्राफी मौसम हिमालीले सम्हालेका छन्। छायांकन नवराज उप्रेती र सम्पादन तथा कलर अमृत चापागाईंले गरेका छन्।
समग्रमा, ‘ख्याल ख्याल ठट्टैमा’ ले नेपाली संगीतप्रेमीलाई नयाँ स्वाद दिनुका साथै विदेशमा रहेर पनि नेपाली कला–संस्कृतिको प्रवर्द्धनमा टेक गुरुङजस्ता सर्जकको योगदान कति महत्वपूर्ण छ भन्ने कुरालाई पुनः पुष्टि गरेको छ।
