१५ पुष २०८२, मंगलवार १२:०१ 
काठमाडौँ । नेपाल सरकार, सञ्चार तथा सूचना प्रविधि मन्त्रालयअन्तर्गतको चलचित्र विकास बोर्डले स्वदेशी चलचित्रको डिजिटाइजेशन कार्यका लागि आवेदन आह्वान गरेको छ।
चलचित्र विकास बोर्ड, चाबहिल काठमाडौँद्वारा प्रकाशित सूचनाअनुसार सेलुलोइड प्रविधिमा निर्माण भई हालसम्म डिजिटल स्वरूपमा रूपान्तरण नगरिएका स्वदेशी चलचित्रलाई डिजिटल माध्यममा सुरक्षित राख्ने उद्देश्यसहित यो कार्यक्रम सञ्चालन गर्न लागिएको हो। यसबाट नेपाली चलचित्रको संरक्षण, प्रवर्द्धन तथा दीर्घकालीन अभिलेखीकरणमा सहयोग पुग्ने बोर्डले जनाएको छ।
डिजिटाइजेशन कार्यक्रममा सहभागी हुन इच्छुक चलचित्र निर्माता वा अधिकार प्राप्त व्यक्तिले सूचना प्रकाशित भएको मितिले २१ दिनभित्र बोर्डले तोकेको ढाँचामा आवेदन पेश गर्नुपर्नेछ। आवेदन फाराम, सहभागिताका शर्त तथा आवश्यक विवरण चलचित्र विकास बोर्डको आधिकारिक वेबसाइट www.film.gov.np तथा बोर्डको सूचना पाटीमा उपलब्ध रहेको जनाइएको छ।
यस विषयमा चलचित्र विकास बोर्डका अध्यक्ष दिनेश डिसीले स्वदेशी चलचित्रहरू नेपालको सांस्कृतिक र ऐतिहासिक धरोहर भएको उल्लेख गर्दै तिनको डिजिटाइजेशन अपरिहार्य रहेको बताए। उनले भने, ‘पुराना स्वदेशी चलचित्रहरू केवल मनोरञ्जनका साधन मात्र होइनन्, ती हाम्रो समाज, समय र इतिहासका महत्वपूर्ण दस्तावेज हुन्। डिजिटाइजेशनमार्फत यस्ता चलचित्रको संरक्षण गर्नु आजको आवश्यकता हो। यस कार्यक्रमले हराउँदै गएका चलचित्रहरूलाई सुरक्षित राख्दै नयाँ पुस्तासम्म पुर्याउन सहयोग गर्नेछ।’
चलचित्र विकास बोर्डले यस कार्यक्रममार्फत पुराना स्वदेशी चलचित्रको दीर्घकालीन संरक्षण, अध्ययन–अनुसन्धानलाई प्रोत्साहन गर्नुका साथै अन्तर्राष्ट्रिय स्तरमा समेत नेपाली चलचित्रको पहुँच विस्तार गर्ने लक्ष्य लिएको जनाएको छ।
