यस वर्षका तीजगीत, मौलिकताभन्दा अश्लिलता बढी हेरियो

१० भाद्र २०७४, शनिबार ०८:४८

<pre>गोपिकृष्ण चापागाईं/ भदौ, काठमाडौं ।</pre>यस वर्षको तीजपर्व आज (शनिबार) बाट औपचारिक रुपमा सकिँदैछ । नेपाली नारीहरूको महानपर्वको रूपमा लिइएको तीजमा नारीहरू व्रत बसी तीजको अर्को दिन पूजा गर्छन र त्यसको भोलिपल्ट पञ्चमीको दिनबाट तीजपर्व पुर्णरुपमा सकिने गर्दछ । यस्तै आज नारीहरूले पूजा गरी यस वर्षको तीजलाई समापन गर्दैछन् ।वर्षमा थुप्रै चाडपर्वहरू आउने गर्दछन् । अझभन्दा तीज पर्व भन्दा ठूलो पर्वको रूपमा मानिने दशैं तथा तिहार पनि आउँदैछन् । गीतसंगीतको कुरा गर्दा अन्य पर्वभन्दा तीज पर्वका लागि भनेर अत्यधिक गीतहरू बन्ने गर्दछन् । तीजका लागि मात्र सयौं गीतहरू रेकर्ड भई बजारसम्म आउने गर्छन् । यस वर्ष पनि पाँचसय बढी तीज गीतहरू बजारमा आए जसमा केही गीतहरूमात्र दर्शक तथा श्रोताको नजरमा पर्न सफल भए । तीज पर्वलाई लक्षित गरी बनाइएका गीतहरू कतिपय भिडियोकेन्द्रित मात्र हुँदा युट्युबमा धेरै हेरिने गरेको पाइन्छ । अझ पछिल्लो समय त तीजका अधिकांश गीतहरू भिडियोका लागि मात्र पनि निकालिन्छ अर्थात युट्युबमा भिडियो बनाएर अपलोड गर्ने र धेरैभन्दा धेरै ‘भ्युज’ बनाउने उद्देश्यले पनि गीत ल्याएको पाइन्छ ।पछिल्लो समय तीजगीतमा मौलिकता हराइरहेको बेला यस वर्ष पनि बजारमा आएका अधिकांश गीतहरूमध्ये केही मात्रामा मात्र मौलिकता झल्किएका पाइयो । युट्युबमा धेरैपटक हेरिँदा गीत लोकप्रिय भयो भनी अनुमान लगाउन सकिन्छ तर त्यसो भनिरहँदा युट्युबमा राखिएको भिडियो अश्लिलताका कारण पनि धेरैपटक हेरिने गरेको पाइन्छ । यो वर्ष युट्युबमा अत्यधिक हेरिएका तीज गीतको कुरा गर्दा दुई महिनाअघि अपलोड गरिएको तिलक ओली र ज्योति मगरको स्वरमा रहेको ‘केटा काटेर’ बोलको गीत नम्बर एकमा परेको छ । तर यो गीतको भिडियो तथा शब्दले दुई अर्थ दिने हुँदा युट्युबले समेत यसलाई उमेरबन्दी (१६ वर्षभन्दा मुनिकाले हेर्न नमिल्ने) बनाइदिएको छ । खुल्दुली इन्टरनेटमेन्टले अपलोड गरेको यो भिडियोलाई दुई महिनाको अवधिमा २४ लाख भन्दा बढीपटक हेरिएको छ । त्यस्तै युट्युब ‘भ्युज’को आधारमा दोस्रो नम्बरमा 'अहिलेको तीज' बोलको गीत परेको छ । चलचित्र क्षेत्रका दुई नायिका वर्षा राउत र वर्षा सिवाकोटीको अभिनय रहेको यो गीतमा सिन्धु मल्लको स्वर रहेको छ । राजकुमार बगरको रचनामा बनेको यो गीतमा तीजको मौलिकता झल्किएको देखिन्छ । यो गीतको भिडियोलाई म्युजिक नेपालले एक महिना अघि अपलोड गरेको हो जसलाई १८ लाखभन्दा बढी पटक हेरिएको छ ।त्यस्तै गायक पशुपति शर्माको भविष्यबाणी गीतलाई पनि धेरैपटक हेरिएको छ । ठट्यौली पाराले बनाइएको यो गीतमा पशुपति शर्मा र मन्जु बिकको स्वर रहेको छ । साथै भिडियोमा पनि पशुपति, मन्जु र सुष्मा लोहनीको अभिनय रहेको छ । यो गीतमा तीजसँग जोडिएका कुनै शब्द नभए पनि रमाइलो तरिकाले प्रस्तुत गरिएको छ । त्यस्तै यो गीत पछाडि रेशम सापकोटा र देवी घर्तीको स्वरमा रहेको वृद्धााश्रम बोलको गीत आएको छ । यो गीतलाई पनि युट्युबमा १३ लाख भन्दा बढी पटक हेरिएको छ । त्यस्तै पशुपति शर्माको अर्को ‘मेरो छोरा दुई नम्बरी गर’ बोलको गीतलाई पनि युट्युबमा ११ लाख भन्दा बढी पटक हेरिएको छ । पशुपतिसँग शान्ति श्री परियारको स्वर रहेको यो गीत पनि ठ्ट्यौली बनाइएको छ । त्यस्तै विशेषगरी तीजकै समयमा गीत गाएर दर्शक तथा श्रोताको मन जित्ने गरेकी गायिका कोमल वलीको एक गीत पनि यो वर्ष निकै हेर्न तथा सुन्ने गरियो । कोमल र उनकी बहिनी प्रज्ञा वलीले गाएको ‘म त नाच्दिनँ के रे’ बोलको गीत कोमलले एक महिना अघि आफ्नै युट्युब एकाउन्टबाट अपलोड गरिन् । जुन गीतलाई निकै राम्रो प्रतिक्रिया पनि आयो । गीतमा कोमल र प्रज्ञा दुवैले नृत्य गरेका छन् । यो गीतलाई पनि युट्युबमा झण्डै १० लाखपटक हेरिएको छ । त्यस्तै खुमन अधिकारी र शर्मिला विश्वकर्माको स्वरमा रहेको ‘सितारा बाटेको डोरी’ बोलको गीतलाई पनि अत्यधिक रुचाइयो । यो गीतको शब्दमा पनि तीजको मौलिकता झल्किएको छ । म्युजिक नेपालबाट युट्युबमा अपलोड गरिएको यो गीतको भिडियोलाई पनि ७ लाख भन्दा बढी पटक हेरिएको छ ।  यसरी यो वर्षको तीज गीतहरू हेर्दा मौलिकता झल्किएका गीतहरू पनि बजारमा केही मात्रामा त आएका छन् तर युट्युबमा बढी हेरिएको कुरा गर्दा अश्लिलता नै बढी हेरिने गरेको छ । गतवर्षको कुरा गर्दा पनि अधिकांश दोहोरो अर्थ तथा निकै छोटा कपडा लगाएर बनाइएका भिडियोहरू लाखौं पटक हेरिएको थियो ।लोकगीतको विषयमा केही स्रष्टाहरूले सेन्सर बोर्डको आवश्यकताको आवाज पनि उठाएका छन् तर सेन्सरको अवाज आवाजमा मात्र सीमित हुँदा दिनप्रतिदिन युट्युबको ‘भ्युज’ केन्द्रित भिडियो बढी आउन थालेका छन् ।  यो सामाग्री हिमालय टाइम्स राष्ट्रिय दैनिकमा पनि प्रकाशित छ ।