फ्राइडे रिलिजः हलमा नेपाली फिल्मको खडेरी

११ पुष २०७६, शुक्रबार ०४:१७

<pre style="text-align: justify; ">आर्टिष्ट खबर/ पुस, काठमाडौं ।</pre>आज (शुक्रबार) कुनैपनि नेपाली चलचित्र प्रदर्शनमा आएका छैनन् । चिसोको मौसमको कारण दर्शक हलसम्म नआउने डरले नेपाली चलचित्रका निर्माता तथा निर्देशक डराएको दुईमहिना भइसक्यो । मंसिर र पुस महिनाका लागी हलले नेपाली चलचित्र देख्न पाएका छैनन् । मंसिरको अन्तिममा केहि नेपाली चलचित्र प्रदर्शनमा आए तर दर्शकले थाहै नपाउने गरी आए र गए ।गएको शुक्रबार र आज एक नेपाली चलचित्र पनि हलमा छैनन् । नेपाली हलमा अहिले बिदेशी चलचित्रका पोष्टर मात्र देखिन्छन् । नेपाली फिल्मको खडेरी नै लागेको छ । गएको साता प्रदर्शनमा आएको बलिउड चलचित्र ‘दबंग ३’ले केहिहदसम्म नेपाली दर्शक बटुल्न सफल भयो तर सलमान खानले जुनरुपमा यसअघि नेपाली दर्शकको माया पाएका थिएनन् त्यसरी यसपटक पाउन सकेनन् । कारण थियो मौसमको असर र चलचित्रको नराम्रो समिक्षा ।आजबाट पनि दुई बिदेशी चलचित्रमात्र प्रदर्शनमा आएका छन्, एक बलिउड अर्को हलिउड । अभिनेता अक्षय कुमार र करिना कपूरको मुख्य अभिनय रहेको ‘गुड न्यूज’ चलचित्रले नेपाली हलमा कब्जा नै जमाएको छ भन्दा हुन्छ । यो चलचित्रलाई क्युएफएक्स चेनले मात्र ४५ सोज दिएको छ । राज मेहताले निर्देशन गरेको यो चलचित्र हाँस्य बिधामा बनेको चलचित्र हो । यस्तै हलिउड चलचित्र ‘द राइज अफ स्काई वर्कस्’ पनि सँगै प्रदर्शनमा आएको छ । यो चलचित्रले पनि क्युएफएक्स चेनमा २० सोज पाएको छ । यसरी यी दुई चलचित्रलाई नेपाली चलचित्र नहुँदा फाइदा पुगेको देखिन्छ । त्यसोत नेपाल चलचित्र प्रदर्शनमा आएतापनि बलिउड तथा हलिउडका चलचित्रले बढी सोज पाउने गरेको थिए तर यसपटक भने नेपाली चलचित्रले पाउने सोज पनि बिदेशी चलचित्रले पाएका छन् ।नेपाली चलचित्र निर्माण टिमले बिशेष गरी बिदाको दिन खोजिरहेका हुन्छन् तर यसपटकको बिदाको माघे संक्रान्तिमा पनि नेपाली चलचित्रको खडेरी देखिएको छ । गएको बर्षको तुलनामा यसबर्ष चलचित्र निर्माणमा पनि गिरावट आएको छ । बर्षमा सयबढी चलचित्र बनिरहेको बेला अहिले यसबर्ष भने ३० देखी ४० प्रतिशतले गिरावट आएको तथ्यांक छ । नेपाली चलचित्रको ब्यापार खस्किएको कारणले यसरी चलचित्र निर्माणमा गिरावट आएको हो । नेपालमा बनेका चलचित्रमध्ये १० देखी १५ प्रतिशत चलचित्रले मात्र मुनाफा कमाएको पाइन्छ । त्यस बाहेक अधिकांश चलचित्रले लगानी समेत उठाउन सकेका हँदैनन् ।