२० पुष २०८२, आईतवार १८:२५ 
काठमाडौँ । बालबालिकाको प्रतिभा अभिवृद्धि गर्ने उद्देश्यले आयोजित ‘मिलिनियम किड्स इन्टरनेशनल २०२६’ मा जुनियर र सिनियर केटा–केटी गरी एकैसाथ ४ विजेता घोषित भएका छन्। जमलस्थित राष्ट्रिय नाचघरमा शनिबार सम्पन्न प्रतियोगितामा जुनियर केटातर्फ रिवान बस्नेत र जुनियर केटीतर्फ आरुसी बुढाथोकी विजेता बने भने सिनियर केटातर्फ इङ्गसो जंग थापा र सिनियर केटीतर्फ मानस्वी बस्नेत शीर्ष विजेता घोषित भए।
जुनियर केटातर्फ प्रान्शु बस्नेत फष्ट रनरअप र शिवांशु आर्याल सेकेन्ड रनरअप बने। जुनियर केटीतर्फ अलिमा थापा फष्ट रनरअप, शुभानी पाण्डे सेकेन्ड, अनिता महर्जन थर्ड र क्यारिन बाडेकर फोर्थ रनरअप भइन्। सिनियर केटातर्फ ब्रायन श्रेष्ठ फष्ट रनरअप र शिबाम्सु कटेल सेकेन्ड रनरअप घोषित भए। सिनियर केटीतर्फ सुशासिका घर्ती मगर फष्ट, डिजा आभा तिम्सेना सेकेन्ड, इभानी पुन मगर थर्ड र रेनेश्मी स्थापित फोर्थ रनरअप बनिन्।
रेडियन्ट इभेन्ट म्यानेजमेन्ट एजेन्सीले आयोजना गरेको प्रतियोगिता अन्तर्राष्ट्रिय स्तरको लाइट, स्टेज र साउन्ड सिस्टमसहित सम्पन्न भएको थियो। निर्णायक मण्डलमा होमनाथ आचार्य, सन्तोष दाहाल, बुनु राई, सुरैया शाक्य र कल्पना त्रिपाठी रहेका थिए। कोरियोग्राफी अन्तर्राष्ट्रिय मोडल तथा फेसन कोच राज फैजु ले गरेका थिए भने ड्रेस डिजाइन श्रीषा बैदार ले गरेकी थिइन्। प्रतियोगिताको यो चौथो संस्करण हो।
