चलचित्र निर्माता संघद्वारा राहत माग

६ चैत्र २०७६, बिहीबार १३:५५

<pre style="line-height: 1.42857; text-align: justify;">आर्टिष्ट खबर/ चैत, काठमाडौं ।</pre>चीनबाट महामारीको रुपमा फैलिरहेको नोबल कोरोना भाइरसका कारण हरेक क्षेत्र प्रभावित भएका छन्। यसैबीच नेपालमा यस भाइरस फैलिन नदिनका लागी नेपाल सरकारले बिभिन्न कदम चालिरहेको छ। त्यसैगरी उपप्रधान एवं रक्षामन्त्री ईश्वर पोखरेलको नेतृत्वमा रहेको कोभिड–१९ रोकथाम तथा नियन्त्रण उच्च स्तरीय समन्वय समितिले बुधबार बैशाख १८ सम्मलाई सम्पूर्ण मनोरञ्जन स्थलहरु जस्तै चलचित्र हल, सांस्कृतिक केन्द्रहरु, रंगशाला, जिम, हेल्थ क्लब, म्युजियम लगायतका मनोरञ्जन स्थल बन्द गरिसकेको छ। यसैबीच नियन्त्रण तथा रोकथामका निम्ति नेपालका सम्पूर्ण चलचित्र हलहरु बन्द भएपछि चलचित्रसँगै संगीत क्षेत्रको आर्थिक पक्षमा निकै बाधा आइलागेको छ भने केही दिनमै यस क्षेत्रलाई अझै संकट पर्ने निश्चित छ । यही कुराहरुलाई ध्यानमा राख्दै नेपाल चलचित्र निर्माता संघले सरकारलाई तीन बुँदे राहत माग गर्दै एक विज्ञप्ती सार्वजनिक गरेको छ । यस्तो छ तीन बुँदे राहत माग:-१. नेपालभरका सिनेमा घरहरुले प्रयोग गर्ने विजुली बत्तीको भुक्तानीमा मिनाहा, नेपाली चलचित्रको टिकट रकममा लाग्ने अतिरिक्त मुल्य अभिवृद्धि कर VAT पूर्ण रुपमा मिनाहा गरिनु पर्ने ।२. चलचित्र तथा गीत संगीत क्षेत्रका कलाकार, श्रमिकहरुले चलचित्र सम्बन्धी काम गरे वापत प्राप्त गर्ने पारिश्रमिकमा कटाइने कर TDS मिनाहा गरिनु पर्ने ।३. चलचित्र निर्माण, प्रदर्शक र गीत संगीत उत्पादन गर्ने कम्पनीहरुले बैंक तथा वित्तीय क्षेत्रबाट लिएको कर्जाहरुमा लाग्ने व्याज पूर्ण रुपमा मिनाहा गरिनु पर्ने ।सरकारले नेपालमा संचालित १ सय ४१ हल बन्दसँगै देशभर कुनै पनि सभा-समारोह, सिनेमा छायांकन र २५ जना बढीको ठुलो भिड नगर्न आग्रह गरेको छ । यसबाट सिनेमा क्षेत्रले झन्डै ५० करोड माथिको घाटा बेहोर्नुपर्ने सिनेमा र संगीतसम्वद्द संघ-संस्थाहरुको पुर्वअनुमान छ ।