१२ पुष २०८२, शनिबार ०८:४३ 
काठमाडौं । सीमापार प्रेमको भावनात्मक कथा बोकेको आर्यन सिग्देलको ‘बानी’ सार्वजनिक
काठमाडौँ । नेपाली सिनेमा क्षेत्रमा चकलेटी नायकका रूपमा परिचित आर्यन सिग्देल नयाँ म्युजिकल जर्नी ‘बानी’मार्फत दर्शकमाझ फर्किएका छन् । अभिनय मात्र होइन, भावनात्मक अभिव्यक्तिमा केन्द्रित यो भिडियोले प्रेम, दूरी र बिछोडको कथा कलात्मक रूपमा प्रस्तुत गरेको छ।
दिनेश क्षेत्रीको शब्द, संगीत र स्वरमा तयार ‘बानी’को कन्सेप्ट पनि उनकै हो । ओएसआर डिजिटलबाट सार्वजनिक भिडियोमा आर्यनसँगै करुणा श्रेष्ठ रोमान्टिक भावमा देखिएका छन् । भिडियोले नेपालको एक युवक र सिक्किमकी एक युवतीबीचको प्रेम सम्बन्धलाई कथावस्तु बनाएको छ, जहाँ प्रेमपछि आउने उतार–चढाव र बियोगान्त मोडले दर्शकलाई भावुक बनाउने प्रयास गरिएको छ।
यसअघि सार्वजनिक पोस्टर र टिजरले चासो बढाएको ‘बानी’मा संवाद लेखन दिनेश क्षेत्री र केशव भट्टराईले गरेका छन् । आर्यन र करुणासँगै सबिन कट्टेल र सुस्मिता श्रेष्ठको अभिनयले कथालाई थप जीवन्त बनाएको छ।
उत्सव दाहालको छायांकन, विकास दाहालको सम्पादन र सुब्रत आचार्यको निर्देशनमा तयार ‘बानी’लाई एउटा प्रेमकथामात्र नभई भावनात्मक म्युजिकल अनुभवका रूपमा प्रस्तुत गरिएको छ।
