१५ जेष्ठ २०८३, शुक्रबार ०९:३२ 
काठमाडौं – नेपाली चलचित्रका दर्शकहरूका लागि खुसीको खबर छ। चर्चित नेपाली चलचित्र ‘जारी २‘ नेपालकै अग्रणी ओटीटी प्लेटफर्म ‘सिनेमाघर’ मार्फत सार्वजनिक गरिएको छ। दर्शकहरूलाई घरमै बसेर नयाँ चलचित्र हेर्ने उत्कृष्ट सुविधा दिने उद्देश्यका साथ सिनेमाघरले यो चलचित्र विश्वभर एकसाथ स्ट्रिमिङमा ल्याएको हो। अब स्वदेश तथा विदेशमा रहेका जोकोही दर्शकले एचडी (HD) क्वालिटीमा मात्र १९९ र फोरके (4K) क्वालिटीमा २९९ रुपैयाँ तिरेर यो चलचित्रको भरपुर मनोरञ्जन लिन सक्नेछन्।
नेपाली चलचित्र ‘जारी २‘ पूर्वी नेपालको लिम्बु समुदायको संस्कृति र ‘जारी प्रथा‘मा आधारित एक उत्कृष्ट चलचित्र हो। यस चलचित्रलाई उपेन्द्र सुब्बाले लेखन तथा निर्देशन गरेका हुन् भने बाँसुरी फिल्म्सको ब्यानरमा रामबाबु गुरुङ र उनको समूहले यसको निर्माण गरेका हुन्। यो चलचित्र बक्स अफिसमा निकै सफल भएको ‘जारी‘ चलचित्रको दोस्रो श्रृंखला हो। यसमा दयाहाङ राई, मिरुना मगर र विजय बराल जस्ता चर्चित कलाकारहरू मुख्य भूमिकामा रहेको छ। चलचित्रले लिम्बु संस्कृति, उनीहरूको परम्परागत च्याब्रुङ नाच र पुरानो कालखण्डको कथालाई निकै सुन्दर ढंगले पर्दामा प्रस्तुत गरेको छ।
प्रविधिमैत्री बन्दै गएको सिनेमाघरले दर्शकको सहजताका लागि विभिन्न माध्यमबाट चलचित्र हेर्न सकिने विस्तृत व्यवस्था मिलाएको छ। गुगल प्ले स्टोर र एप्पलको एप स्टोरबाट ‘सिनेमाघर एप’ डाउनलोड गरी स्मार्टफोन वा ट्याब्लेटमा चलचित्र हेर्न सकिन्छ। यसका साथै ठूलो पर्दामा चलचित्रको मज्जा लिन चाहनेहरूका लागि एन्ड्रोइड टिभी, अमेजन फायर टिभी, सामसुङ स्मार्ट टिभी र एलजी वेबओएस जस्ता स्मार्ट टिभीहरूमा पनि यो एप सहजै डाउनलोड गर्न सकिन्छ। मोबाइलबाट क्रोमकास्टको प्रयोग गरेर वा कम्प्युटरमा सिधै वेब ब्राउजरमार्फत पनि ‘जारी २’ हेर्न सकिने सुविधा प्लेटफर्मले प्रदान गरेको छ।
दर्शकलाई उच्च गुणस्तरको दृश्य अनुभव प्रदान गर्न सिनेमाघरले हालै मात्र आफ्नो प्लेटफर्ममा ‘फोरके‘ (4K) स्ट्रिमिङको सुरुवात समेत गरेको छ। यस प्रविधिको स्तरोन्नतिसँगै ‘जारी २‘ लगायतका चलचित्रहरू अब अझै उत्कृष्ट, स्पष्ट र जीवन्त भिजुअल क्वालिटीमा हेर्न सकिनेछ।
पछिल्ला वर्षहरूमा ‘सिनेमाघर’ले नेपाली चलचित्रहरूलाई विश्वव्यापी दर्शकमाझ पुर्याउन र नेपाली सिनेमा उद्योगको बजार विस्तार गर्न महत्त्वपूर्ण भूमिका खेल्दै आएको छ। हलमा प्रदर्शन भइसकेका र दर्शकले अत्यधिक रुचाएका चलचित्रहरूलाई डिजिटल माध्यमबाट विश्वभर छरिएर रहेका नेपालीहरूसम्म पुर्याउने कार्यमा यो प्लेटफर्म निकै सफल मानिएको छ। हाल सिनेमाघरमा ‘जारी २‘ का अलावा नेपाली बक्स अफिसमा चर्चा कमाएका ‘१२ गाउँ‘, ‘पिताम्बर’, ‘गाउँ आएको बाटो’ लगायतका दर्जनौँ उत्कृष्ट चलचित्रहरू नियमित रूपमा स्ट्रिमिङ भइरहेका छन्।
