१० श्रावण २०७२, आईतवार २३:३२ 
साउन, काठमाडौं । आलोक नेम्बांग निर्देशित अन्तिम चलचित्र ‘अझै पनि’ नेपालमा २०७१ फागुन १५ गते रिलिज भएको थियो । अब ‘अझै पनि’ ले अमेरिकाबाट आफ्नो विदेश प्रदर्शन सुरु गर्ने भएको छ । अगस्ट १५ मा अमेरिकाको ओमाहा, नेब्रास्कामा चलचित्र प्रदर्शन हुने टुंगो लागेको हो ।
ओमाहा, नेब्रास्कामा हुने प्रदर्शनको जिम्मेवारी एनएनएस सोसाईटीले लिएको छ । यो चलचित्रलाई अमेरिकाभर प्रदर्शनको लागि राज आचार्यले जिम्मा लिएका छन् । नेब्रास्काको प्रदर्शनपछि अमेरिकाका अन्य विभिन्न शहरहरुमा पनि प्रदर्शनमा आउने आचार्यले बताएका छन् ।
अझै पनि विशुद्ध सामाजिक कथामा बनेको चलचित्र हो । यो चलचित्रले काठ क्षेत्रको रहन(सहन, सोच तथा नारीको संवेदना एवं सिन्दुर पोतेको महत्वलाई प्रकाश पार्छ । आफुले निर्देशन गरेको चलचित्र प्रदर्शनमा नआउँदै निर्देशक नेम्बांगको निधन भएको थियो ।
यो चलचित्रलाई सुदर्शन थापा प्रोडक्शन तथा पुनम इन्टरटेनमेण्टको ब्यानरमा पुनम गौतम र सुदर्शन थापाले निर्माण गरेका हुन् । चलचित्रमा सुदर्शन थापा, पुजा शर्मा र सुरक्षा पन्त को प्रमूख अभिनय छ भने पुष्प खड्का, प्रमिला खनाल, विशाल ढुंगाना, विजय लामा, बिपना धिमाल, मिथिला शर्मा, रामशरण पाठक लगाएतले पनि अभिनय गरेका छन् ।
