२ मंसिर २०८१, आईतवार ०९:०९ 
काठमाडौँ । नयाँ वियोगान्त गीत बाबा आमा…को भिडियो सार्वजनिक गरिएको छ । गीतको भिडिओलाई शुक्रबार बेलुका ओएसआर डिजिटल युट्युव च्यानलबाट सार्वजनिक गरिएको हो ।
गायक शिव परियारको स्वरमा रहेको यो गीत निकै मार्मिक छ । यो गीतमा संगीतकार दीपक शर्माको संगीत, कुशल सिंहको संगीत संयोजन, राजेश श्रेष्ठको रेकर्डिङ र किशोर थापाको मिक्सिङ रहेको छ ।
यो गीतको भिडिओ बाबा आमामा सरोज खनाल, सूर्यमाला खनाल, भुवन लोहनी, साईना डंगोल, आशामायाँ डंगोल, संजोग अधिकारी, प्रान्भी अधिकारी, अकलमान डंगोल, सुरेन्द्र डंगोललगायतका कलाकारले अभिनय गरेका छन् । यो गीत जस्तै भिडिओ पनि निकै मार्मिक बनेको छ ।
यो गीतलाई भुवन लोहनीले लेखेका हुन् । केही वर्षदेखि अमेरिकाको केन्टकी स्थित ल्याग्जिन्टनमा रहँदै आएका भुवनले यस अघि आधा दर्जन म्युजिक भिडिओमा मोडलिङ गरेका थिए । आफैंले लेखेको यो गीतमा भुवन आफैंले छोराको भूमिका निभाएका छन् ।
यो गीतमा उनको वुवाको रुपमा सरोज खनालले र आमाको रुपमा सूर्यमाला खनालले अभिनय गरेका छन् ,‘कार दुर्घटनामा मेरो परिवार नै नरहे पनि मैले गीत भने वुवा आमामा समर्पित रहेर उहाँको सँघर्षको कथा समेटेर बनाएको हुँ ।’ भुवनले भने ।
यो गीतको भिडिओलाई विशाल घिमिरेले निर्देशन गरेका हुन् । भिडिओको कार्यकारी निर्माता सौगात बस्नेत हुन् । जसमा नवराज उप्रेतीको छायाँकन, सौगात बस्नेतको सम्पादन, राजेन्द्र मोक्तानको रंग संयोजन रहेको छ ।
