११ माघ २०८१, शुक्रबार ०९:४९ 
काठमाडौँ । आगामी महाशिवरात्री (फागुन १४)बाट प्रदर्शनमा आउने तयारीमा रहेको चलचित्र ‘लाज शरणम्’कोक्यारेक्टर पोस्टर सार्वजनिक गरिएको छ । पोस्टरमा चलचित्रका मुख्य पात्रहरुको पात्र चित्रण गरिएको छ । पोस्टरमा सिताराम कट्टेल (धुर्मुस्)लाई ठुलो स्थान दिइएको छ । साथै बिजय बराल, अर्पण थापा, महेश त्रिपाठी, कमलमणी नेपाल र मुकुन्द श्रेष्ठलाई पोस्टरमा देखाइएको छ ।
पोस्टरमा धुर्मुस्लाई नेताको भूमिकामा देखाइएको आंकल गर्न सकिन्छ । उनको लुक्सले पूर्वमन्त्री तथा कांग्रेस नेता मोहम्मद आफतव आलमलाई झल्काएको अनुमान गरिएको छ। साथै, पोस्टरमा कफिन बोकेका स्थानीयहरूको दृश्यले चलचित्रको गहिरो कथावस्तु झल्काएको छ। यसअघि निर्माण टिमले धुर्मुस् चलचित्रमा छन् कि छैनन् भन्ने गोप्य राखेको थियो । अहिले पोस्टरबाट उनको पनि महत्वपुर्ण भूमिका छ भन्ने बुझ्न सकिन्छ । नविन श्रेष्ठको लगानी रहेको यो फिल्मलाई कुमार कटट्ेलले निर्देशन गरेका हुन् ।
‘लाज शरणम्’ हास्य टेलिश्रृंखला ‘सक्किगोनि’ टिमले निर्माण गरेको चलचित्र हो । यसमा अर्जुन घिमिरे (पाँडे), सागर लम्साल (बले), हरिष निरौला (क्रकोज), प्रियाना आचार्य (मुन्नी)लगायतका कलाकारले अभिनय गरेका छन्।
