१३ माघ २०८१, आईतवार ०९:४२ 
काठमाडौँ । नयाँ चलचित्र ‘सारंग’को ट्रेलर सार्वजनिक गरिएको छ । बिहीबार ओस्कार कलेजका बिद्यार्थीहरु माझ एक कार्यक्रम गर्दै चलचित्रको ट्रेलर दर्शक माझ ल्याइएको हो। ट्रेलर रिलिज कार्यक्रमको सहजीकरण ओस्कार कलेजका एकेडेमी कोअर्डिनेटर नवनिधि दाहालले गरेका थिए। कार्यक्रममा बिद्यार्थीहरुबीच सुटिंग अनुभव साट्ने र बिद्यार्थीहरुको जिज्ञासा मेट्ने कार्य गरिएको निर्देशक प्रशान्त तामाङले जानकारी दिए।
‘सारंग’ एक पटक हेर्नै पर्ने फिल्म बनेको बताउदै सबै दर्शकलाई आव्हान गरिएको छ । ट्रेलरले अभिभावकबीचको बेमेलले सन्तानको मानसिकतामा पार्ने असर,धनी-गरिव बीचको खाडलको कथा बोल्छ । निर्देशक प्रशान्त तामाङकै लेखन,निर्माण अनि निर्देशनमा बनेको फिल्मले गत साता राजधानीमा आयोजना गरिएको विशेष शोमा तारिफ पाएको थियो । यश प्रकारका फिल्म सम्पूर्ण परिवारले हेर्नू पर्ने धारणा दर्शकहरुले राखेका थिए ।
ऋचा शर्मा,उत्पल झा,समीरमणि दीक्षित,सुरज तमु,मणि के राई,अनिषा न्यौपाने,निरज ब्ल्याक,बिश्व स्याङ्बो,दीपीका थापा,सुमन सागर जंग केसी,प्रभात श्रेष्ठका साथमा बालकलाकार द्वय सम्राट थापा र आदित्य मुख्य भूमिकामा रहेको फिल्मको निर्मातामा प्रेम तामाङ र फूलमाया तामाङ छन् । पुष्पा लिम्बू र बिनु गुरुङ सहनिर्माता रहेको चलचित्र गोपाल रायले खिचेका हुन् । दर्शन बुद्ध फिल्मस्को ब्यानरमा निर्माण भएको चलचित्रको सम्पादन मित्र डि गुरुङले गरेका हुन् ।चलचित्रमा शंकर थापा स्माइल र नकुल कार्कीको संगीत,शास्वत श्रेष्ठको बिजीएम अनि सुष्मा राईको कोरियोग्राफी छ। चलचित्रलाई देशभर स्टेशन ५ ले बितरण गर्दैछ ।
