२९ पुष २०८१, सोमबार १८:४९ 
काठमाडौँ । चलचित्र वसन्तको सार्वजनिक पहिलो गीतको चर्चा बढ्न थालेको छ । युट्युवमा सार्वजनिक साँझ पर्यो झमक्क बोलको गीतको भिडिओलाई २४ घण्टामै १२ लाख भन्दा बढी पटक हेरिएको छ । साथै संगीत तर्फको युट्युव ट्रेन्डिंगको तेस्रो स्थानमा समेत परेको छ । यो चलचित्रलाई गायक तथा अभिनेता प्रकाश सपुतले निर्देशन गरेका छन् । उनको यो डेव्यु निर्देशकिय चलचित्र हो । चलचित्रमा उनको मुख्य अभिनय पनि रहेको छ ।
सार्वजनिक गीतको कमेन्टबक्समा दीपक विश्वकर्मा नामका दर्शकले लेखेका छन्, ‘प्रकाश सपुतको यो कलालाई उच्च सम्मान छ । यो सिनेमा ‘वसन्त’ सुपरहिट बन्न सफल बनोस् । शुभकामना ।’ यता अर्का दर्शक अनिलले लेखेका छन्, ‘म त प्रकाश सपुतको प्रतिभा र क्षमता देखेर अचम्मै पर्छु । भगवान छन भने र भगवानले मान्छे बनाउछन भने साच्चिकै फुर्सदमा धेरै समय खर्चेर बनाएको मान्छे जस्तो । आहा कति प्रतिभाशाली ।’
यस्तै अर्का दर्शक दीपक बस्नेतले लेखेका छन्, ‘हाम्रो पुरानो सव्यता संस्कृति जोगाउने अहिलेको एकमात्र पुरुष प्रकाश सपूत । तिमी साचिँकै सपूत हौं ।’ उनीसँगै गीतको कमेन्टबक्समा अर्का दर्शक हिमाल सागर हिङमाङ्गले लेखेका छन्, ‘बिस्तारै नयाँ पिढीँहरु यसैगरी नेपाली मौलिक लोक गीतहरुमा भिज्दै गइरहेको देखिन्छ यो सबै कथावस्तुको प्रभावले हो । जो प्रकाश दाईले आफ्ना प्रस्तुतीहरु मौलिकपन एकपछि अर्को गर्दै दिइरहनु भएको छ । सिनेमा ‘वसन्त’को सम्पुर्ण टिमलाई उच्च सफलताको कामना गर्दछु ।’
सार्वजनिक गीतमा गायनमा सपुतलाई पछिल्लो समयकी चर्चित गायिका शान्तिश्री परियारले साथ दिएकी छन् । उनले स्वर दिएका एकपछि अर्को गीत युट्युब ट्रेन्डिङसँगै चर्चाको शिखरमा रहने गरेको भन्दै दर्शक तथा श्रोताले तारिफ गरिरहेको सामाजिक सञ्जालमा देख्न सकिन्छ । वसन्तको यो गीतले दर्शकमाझ सिनेमाको हाइप बढाउन सफल रहेको गीतमा मिलेका प्रतिक्रियाबाट समेत बुझ्न गाह्रो पर्दैन् ।
चलचित्रको पहिलो गीत सार्वजनिक भएसँगै भिडियोमा देखिएका सवै कलाकारसहित विशेषगरी मुख्य भूमिकामा अभिनय गरेका गायक सपुत र अभिनेत्री स्वस्तिमा खड्काको जोडी सुहाएको भन्दै तारिफ गरिरहेका छन् । चलचित्रमा प्रकाश सपुत, स्वस्तिमा खड्का, प्रभात पाल ठकुरी, श्री शिभान्सी, उर्मिला लाम्गादे र खड्क बहादुर पुन (खबपु), अनुप बराल, कमलमणी नेपाल, प्रकाश घिमिरे लगायतका कलाकारको पनि अभिनय रहेको छ ।
गलबन्दी प्रोडक्सनको प्रस्तुति रहने सोसल ड्रामा सिनेमामा कथा, पटकथा र संगीत पनि सपुतले नै तयार पारेका हुन् । विपन्न विश्वकर्मा समुदायको छोराको लेखक बन्ने सपना र लक्ष्य हासिल गर्न उसले गर्ने संघर्षको कथा सिनेमाले भन्ने छ । सिनेमाको निर्मातामा मोहन विश्वकर्मा र बिन्दु बोहोरा तथा कार्यकारी निर्मातामा अनुरोध भट्टराई, नाना थकाली र विरेन्द्र नारायण श्रेष्ठ छन् ।
चलचित्रलाई सुसन प्रजापतिले खिचेका हुन् । काठमाडौं उपत्यकामा डिसिएन र मोफसलमा एफडी कम्पनिले सिनेमालाई वितरण गर्नेछन् ।
