६ असार २०८३, शनिबार २३:२५ 
काठमाडौं । ब्युटीसँग सम्बन्धित ज्ञान र पेशागत विकासलाई लक्षित गर्दै तयार गरिएको पुस्तकको औपचारिक विमोचन शनिबार काठमाडौंको शंखमुलस्थित एवान क्याफेमा सम्पन्न भएको छ। पुस्तक विमोचन कार्यक्रमसँगै ब्युटी प्रोडक्ट ‘आभा’ को पनि सार्वजनिक गरिएको छ । कार्यक्रम मायाज् ब्युटि पार्लर तथा ट्रेनिङ सेन्टरले आयोजना गरेको हो ।
कार्यक्रमको मुख्य आकर्षणका रूपमा रहेको उक्त पुस्तकलाई ब्युटी क्षेत्रमा देखिएका भ्रम, गलत जानकारी र आधारभूत ज्ञानको अभावलाई सम्बोधन गर्ने उद्देश्यसहित तयार पारिएको लेखकले जानकारी दिए। व्यवहारिक अनुभवमा आधारित यस पुस्तकले विद्यार्थी, प्रशिक्षार्थी तथा पेशागत रूपमा संलग्न व्यक्तिहरूलाई नैतिक अभ्यास, जिम्मेवार सेवा र दीर्घकालीन करियर विकासमा मार्गदर्शन गर्ने अपेक्षा गरिएको छ।
कार्यक्रममा प्रमुख अतिथिका रूपमा लोकप्रिय नायिका तथा चलचित्र निर्देशक झरना थापा उपस्थित रहिन्। त्यस्तै अतिथि कलाकारहरूमा मोडल पवित्रा साकी (मिस पवि) र अभिनेत्री झरना रिसालको उपस्थिति रहेको थियो।
सोही अवसरमा मायाज् ब्युटी पार्लर तथा ट्रेनिङ सेन्टरबाट तालिम पूरा गरेका प्रशिक्षार्थीहरूलाई प्रमाणपत्र वितरण गरिएको थियो। आयोजकका अनुसार प्रमाणपत्र वितरणले उनीहरूको सीप र पेशागत क्षमताको औपचारिक मान्यता प्रदान गरेको हो।
आयोजक संस्थाले कार्यक्रम सफल बनाउन सहयोग गर्ने अतिथि, प्रशिक्षक, सहकार्यकर्ता तथा सहभागी सबैप्रति आभार व्यक्त गरेको छ।
