३१ जेष्ठ २०८३, आईतवार १५:०९ 
काठमाडौं । बि एण्ड बि टेक ग्रुपले शनिबार काठमाडौंको बालुवाटारस्थित रोयल एम्पायर बुटिक होटलमा आयोजित विशेष समारोहबीच आफ्ना नयाँ व्यावसायिक उद्यमहरूको औपचारिक शुभारम्भ गर्दै ‘तिम्रो टिकट’ नामक ईकेटिङ मोबाइल एप सार्वजनिक गरेको छ ।
सन् २०१८ मा विद्यालयकालीन साथीहरू डा। विकाश लाम्साल र इन्जिनियर विमलकुमार केसीद्वारा स्थापना गरिएको बि एण्ड बि टेकले निरन्तर विस्तार र विकासको यात्रामा अघि बढ्दै सन् २०२२ मा ‘बि एण्ड बि टेक ग्रुप’को रूपमा पुनःब्रान्डिङ गरेको थियो । प्रविधि अनुसन्धान तथा विकासका क्षेत्रमा सक्रिय कम्पनीले जापानका प्रतिष्ठित संस्थाहरू तथा कम्पनीहरू जस्तै काजिमा कर्पोरेशन, एनएआइटी कर्पोरेशन तथा आइबिएमसँग सहकार्य गर्दै अन्तर्राष्ट्रिय स्तरमा आफ्नो उपस्थिति बलियो बनाएको छ ।
कार्यक्रममा बि एण्ड बि टेक ग्रुपसँगै बि एण्ड बि टेक्निकल रिसर्च इन्स्टिच्युट, फिस्टेल एकेडेमी ब्रिज तथा हाकिम इन्टरटेन्मेन्टको संयुक्त सहकार्यको औपचारिक घोषणासमेत गरिएको थियो । यी संस्थाहरूले प्रविधि, अनुसन्धान, शिक्षा, सीप विकास तथा मनोरञ्जन क्षेत्रलाई एकै मञ्चमा जोड्दै नेपालमा नवीन अवसरहरू सिर्जना गर्ने लक्ष्य लिएको जनाइएको छ ।
विभिन्न क्षेत्रका विशिष्ट व्यक्तित्व, उद्योगी–व्यवसायी, सञ्चारकर्मी, कलाकार तथा युवा उद्यमीहरूको उल्लेखनीय सहभागिता रहेको उक्त कार्यक्रमको शुभारम्भ पारम्परिक दीप प्रज्वलनबाट गरिएको थियो । कार्यक्रमले नेपाली युवाहरूका लागि प्रविधि, अनुसन्धान, शिक्षा र सिर्जनात्मक उद्योगबीच सहकार्यको नयाँ सम्भावनाको सन्देश दिएको सहभागीहरूले बताएका थिए ।
कार्यक्रमको पहिलो चरण प्रेरणादायी व्यावसायिक यात्रा र अनुभव आदानप्रदानमा केन्द्रित रहेको थियो । बि एण्ड बि टेक ग्रुपका अध्यक्ष तथा सह–संस्थापक डा। विकाश लाम्सालले आफ्नो व्यावसायिक तथा अनुसन्धान यात्राबारे प्रस्तुति दिँदै नेपालबाट जापानसम्मको आफ्नो संघर्ष, उपलब्धि तथा अन्तर्राष्ट्रिय अनुभवहरू सहभागीहरूसँग साझा गर्नुभएको थियो । उहाँले अत्याधुनिक प्रविधि, अनुसन्धान तथा नवप्रवर्तनलाई नेपालमा भित्र्याई देशको विकासमा योगदान पुर्याउने आफ्नो दीर्घकालीन लक्ष्यबारे पनि जानकारी गराउनु भएको थियो ।
त्यसपछि चर्चित नेपाली र्याप कलाकार सुरेन्द्र गुरुङ ९हाकिम०ले फेशन मोडलिङदेखि नेपाली हिप–हप संगीत क्षेत्रमा स्थापित कलाकार बन्ने आफ्नो प्रेरणादायी यात्राबारे अनुभव सुनाउनुभएको थियो । उहाँले निरन्तर मिहिनेत, लगनशीलता र आत्मविश्वासले कुनै पनि क्षेत्रमा सफलता हासिल गर्न सकिने सन्देश दिनुभएको थियो ।
कार्यक्रमको दोस्रो चरणमा विस्तार, सहकार्य तथा भावी योजनामाथि केन्द्रित प्रस्तुति राखिएको थियो । फिस्टेल एकेडेमी ब्रिजका प्रमुख सञ्चीव अर्यालले संस्थाको भावी योजना प्रस्तुत गर्दै नेपालका युवाहरूलाई जापानस्तरीय भाषा, सीप तथा व्यावसायिक दक्षतासँग जोड्ने लक्ष्य रहेको बताउनुभयो । उहाँले शिक्षा, प्रविधि तथा उद्योगबीचको सम्बन्धलाई अझ सुदृढ बनाउँदै युवाहरूलाई अन्तर्राष्ट्रिय अवसरसँग जोड्ने प्रतिबद्धता व्यक्त गर्नुभयो ।
कार्यक्रमको मुख्य आकर्षण बि एण्ड बि टेक ग्रुपद्वारा विकसित ‘तिम्रो टिकट’ ई–टिकेटिङ मोबाइल एपको औपचारिक सार्वजनिकरण थियो । कम्पनीका फुल–स्ट्याक डेभलपर आश्विन सुनारले एपका विभिन्न विशेषताहरू, प्रयोगकर्ता–मैत्री डिजाइन तथा नेपालमा टिकट व्यवस्थापनलाई डिजिटल, सुरक्षित र सहज बनाउने उद्देश्यबारे विस्तृत प्रस्तुति दिनुभएको थियो ।
उहाँका अनुसार ‘तिम्रो टिकट’ एपले विभिन्न कार्यक्रम, सांगीतिक कन्सर्ट, खेलकुद प्रतियोगिता, सांस्कृतिक गतिविधि तथा अन्य सार्वजनिक कार्यक्रमहरूको टिकट खरिद तथा व्यवस्थापन प्रक्रियालाई सरल र आधुनिक बनाउनेछ । यसले नेपालमा डिजिटल टिकटिङ संस्कृतिको विकासमा महत्वपूर्ण योगदान पुर्याउने अपेक्षा गरिएको छ ।
कार्यक्रमको अन्त्य अन्तरक्रियात्मक प्रश्नोत्तर सत्रमार्फत गरिएको थियो । उक्त सत्रमा सञ्चारकर्मी, उद्योगी–व्यवसायी तथा सहभागीहरूले नवप्रवर्तनशील प्रविधिहरू, ‘तिम्रो टिकट’ एपको भावी विकास, अनुसन्धान तथा विभिन्न संस्थाहरूबीच हुने सहकार्यका सम्भावनाबारे जिज्ञासा राखेका थिए ।
आयोजकका अनुसार बि एण्ड बि टेक ग्रुप, बि एण्ड बि टेक्निकल रिसर्च इन्स्टिच्युट, फिस्टेल एकेडेमी ब्रिज तथा हाकिम इन्टरटेन्मेन्टबीचको सहकार्यले नेपालमा प्रविधि, अनुसन्धान, शिक्षा तथा सिर्जनात्मक उद्योगको विकासमा महत्वपूर्ण योगदान पुर्याउने अपेक्षा गरिएको छ । साथै, ‘तिम्रो टिकट’ जस्ता डिजिटल समाधानहरूले नेपालको प्रविधि तथा इभेन्ट व्यवस्थापन क्षेत्रलाई नयाँ उचाइमा पुर्याउने विश्वास व्यक्त गरिएको छ ।
